The content originally appeared on:
Diario
Rulienne Arends di FADA:
*Mester pone mas enfasis ta riba e control
ORANJESTAD (AAN): Cada bes mas ta sali afo mas detayenan relaciona cu e uzo di ‘vaping’ na Aruba. Trahado Preventivo di Fundacion Anti Droga Aruba (FADA, Rulienne Arends, a duna di conoce cu lamentablemente uzo di ‘vaping’ ta hopi grandi bao di nos hobennan.
El a indica cu den cada klas di scolnan secundario, cu tin rond di 30 mucha, sigur mas cu mitad di nan ta uzando ‘vape’ of a experimenta cu ‘vape’. FADA tambe ta keda monitor e scolnan basico.
Arends a bolbe lamenta e echo cu hopi scol ta yama FADA pa bisa cu ta mira hopi di e productonan aki y cu e muchanan ta hay’e fo’i di cas.
El a laga sa cu cualkier preocupacion cu FADA ta topa cu ne, e ta algo cu nan ta comparti cu e minister concerni como tambe cu otro stakeholdernan unda cu ta wak cu e ley mester ta un tiki mas fuerte ora cu ta papia di ‘vape’.
Rulienne Arends a laga sa cu esaki ta algo cu ta wordo traha riba dje caba, pero si tur esnan concerni, mirando cu esaki ta yega hopi cerca di e hobennan, ta bezig ta haci tur e cambionan necesario.
Ta berdad cu e ley di tabaco ta pa 21 aña pariba. Den e caso aki, ‘vape’ ta contene nicotina, tabaco y unda mester pone mas enfasis ta riba e control. ‘Vaping’ ta hopi accesibel pa nos hobennan , cu por bay cumpr’e trankilamente sin cu nan ta wordo pidi un ID.
