The content originally appeared on:
Diario
ORANJESTAD (AAN): Dia 29 di mei pa 5‘or di atardi, Universidad di Aruba ta organisa e siguiente evento den e serie “Slavery: Past and Present in Aruba”.
E sesion aki ta tocante unificacion y sanacion. Door di tende e historia di e decendientenan Indigena y esnan cu tabata catibo, e herencia di e historia di e catibonan ta bira visibel, y por discuti’e den nos sociedad di awendia.
E charla aki lo trece dilanti e historia personal di con e decendientenan ta experencia e herencia di e historia di e catibonan den nan bida diario, den comunidad, y den nan ambiente. Ademas, nos lo para keto na e historia di esnan cu a sobrevivi sclavitud moderno, nan lucha pa libertad y e desafionan cu nan ta confronta tur dia.
Comprondiendo e pasado ta un paso crucial pa reconciliacion, aceptacion y sanacion. Den un sociedad multicultural chikito manera Aruba, esaki por ofrece un oportunidad unico pa unificacion, sanacion y cooperacion pa combati sclavitud moderno y pa elimina e division existente tocante e historia di sclavitud den pasado.
Durante e evento aki, tanto e publico como e oradornan Nigel Maduro (Yiu di tera), Sonny Richardson (WeCulture); Layzmina Emerencia (Afronology Movement), Seukyen Croes (namens het CMMA) lo invita e publico presente pa pensa criticamente riba con nos por logra sanacion y reconciliacion pa tur e descendientenan di catibo na Aruba. Kico ta e rol di cada habitante, pero principalmente di e descendientenan, den mantene e historia di e catibonan bibo den nos consenshi di awendia y pa e generacionan di futuro?
Universidad di Aruba ta invita tur hende cu ta interesa pa asisti na e evento importante y emocionante aki.
