The content originally appeared on:
Diario
Wayanan di Fiber Optic na Sero Biento
Setar NV a traha mas di 16 ora riba e problema
ORANJESTAD (AAN): Lo mester tin hende cu Diaranson mainta por a mira sea un Truck, Dumptruck cu contenido halto, of un vehiculo lastrando un Trailer extra halto, cu a crea desastre den area di e T-weg na Sero Biento, pa e caminda cu ta bay Santa Martha.
E vehiculo pisa aki, cu keto bay ta desconoci, a pasa y ranca wayanan diki di Fiber-Optic di Setar NV. E wayanan lo a haak na algo di e vehiculo of e carga, y esaki a rek tur cos bin abao cune. Loke el a ranca tambe ta un asina yama ‘Fiber Optic Box’, conteniendo conexionnan complica cu ta manda data pa varios area.
Ora cu esaki a socede, inmediatamente un area grandi di Aruba a perde señal di Digital CableTV, IPTV di Cable, y tambe data di internet.
Areanan cu a keda sin comunicacion ta Sero Biento, Hooiberg, Morgenster, Pavia, Piedra Plat, Rooi Afo, Paradera, Roncado, Jaburibari, Papaya, Catiri, Tanki Leendert, Modanza, Moko, Paraguana, Casibari, Babijn, Marawiel, Ayo, Sero Pita, Cashero, Wayaca Residence, Papilon, Santa Cruz, Kas Ariba, Angochi, Sero Pela, Macuarima, Urataca, Mondi Fierno, Balashi, Jucuri, Vigia, Esmeralda,
E rekmento di wayanan nobo di Fiber a bay basta rapido, y a haci ahustenan pa evita cu algo similar lo socede. Sinembargo a bin topa cu dolor di cabez ora di reconstrui e Fiber Optic Box. Aki ta unda cu a confronta obstaculonan, y asina a keda demostra cu e daño ta mucho mas avanza cu loke a pensa na comienso.
Hecho ta cu full un team di Setar NV a keda traha riba esaki for di mainta, y ora cu solo a baha atardi, keto bay tabata sigui traha cu e trouble-shooting di e dificultadnan cu tabata enfrenta. Como mas di 12 ora despues, porfin a conecta como 80% di e areanan bek cu data y señal di TV. Pero otronan mester a warda un tiki mas pa a keda cla e anochi ey mes ainda.
Si cualkier persona tin informacion ta cua truck of vehiculo lo a benta Internet di un parti grandi di Aruba afo, por yama Tipline di Polis na 111-41 pa duna informacion.
