The content originally appeared on:
Diario
Donacion di $65.000 na comunidad
Tur hende a haya delicioso Angus Brisket cushina pa 8 ora largo
ORANJESTAD (AAN): E evento culinario caritativo di Wind Creek Aruba, esta ‘Long Table Aruba’ riba caya meymey di Lloyd G. Smith Boulevard, un biaha mas a sobrepasa tur expectativa celebrando e di seis edicion riba Diadomingo anochi. Exactamente 1.000 persona sinta na e mesa largo ta come, y e biaha aki cu delicioso Angus Brisket cu a cushina pa 8 ora largo.
Desde aña 2017, Long Table Aruba a recauda mas di $335,000 pa organizacionnan local y ta un evento sumamente importante pa Wind Creek na Aruba. “Nos ta compronde e importancia di conecta cu e comunidad y nos ta desea di sostene organizacionnan local na e manera cu lo realmente ta beneficia e comunidad di Aruba,” asina Sr. Paul Gielen, Gerente General di Wind Creek Aruba a declara.
E aña aki Wind Creek Aruba a cambia e proceso y a selecta 10 organizacion den comunidad activo y a invita esaki nan pa participa. Cada un di e organizacion aki tabata tin e tarea di crea un video impresionante, cu e oportunidad pa gana un sosten financiero. E seleccion di e aña aki a worde enfatisa riba e yudansa na nos grandi y sosten pa nos hobennan cu ta enfrenta circunstancianan desafiante. Cu e focus pa renoba e bienestar den nos comunidad, Wind Creek Aruba ta compromete su mes pa haci un cambio y impacto den bida di esnan cu ta den nesesidad. Pueblo por a haci nan voto pa un di e video nan aki online.
Ganadornan di e concurso di video di Long Table Aruba 2024: Club Kibrahacha a bay cu $15.000. Stichting Hunto Inloophuis $10.000. Fundacion Hospice Atardi cu $10.000. Sonrisa cu $10.000. Fundacion Contra Violencia Relacional (FCVR) a ricibi $10.000.
Wind Creek Aruba a duna adicionalmente na e otro 5 instancianan cu a participa tambe un suma di $2000 na cada un, esta ADRA Teen Mother Project a haya $2.000, Ambiente Nobo a haya $2.000, Give Me A Break a haya $2.000, Bump Aruba a haya $2.000, y Fundacion Biba Bao Guia a haya $2.000.
Sr. Gielen ta splica cu nan tin suerte di tin un team cu ta dedica y ta uni forsa pa por produci un evento exepcional cu ta honra nos comunidad local na Aruba. Nan a ricibi cooperacion pa cera e caminda ya caba for di 12’or di merdia pa realisa e setup di e mesa largo cubriendo un parti di L.G. Smith Boulevard. Alrededor di 11’or di anochi a habri e caminda back pa publico.
E evento a bira posible cu yudansa grandi di algun patrocinador cu tambe tabata dispuesto pa un biaha mas duna nan aporte na e bunita proyecto aki. Wind Creek Hospitality conhuntamente cu Renaissance Wind Creek Aruba Resort ta gradici su staf y personal, tur e instancia nan cu a participa na e competencia di video, y e patrocinadornan.
