The content originally appeared on:
Diario
Hemchi a yena!
ORANJESTAD (AAN): Edward Maduro di Sindicato di Cuerpo di Douane (SADA) a indica cu varios biaha a ser bisa cu e edificio caminda nan ta ubica ta algo temporario, supuestamente pa 3 aña, ya cu lo mester a ubica den un edificio nobo.
Sinembargo, nuebe aña despues ni e tereno no a wordo roza ainda. Pero el a remarca cu locual ta pasando den Douane ta algo inaceptabel pasobra constantemente ta haya situacionnan manera cu airco ta danja, oficinanan ta den calor y parce un wega tin pa wak cual oficina ta bira calor awe.
Segun Maduro, e edificio no ta uno apto y te hasta no tin ningun tipo di ventilacion y esey por ta algo cu ta afecta hende cu ta sufri di presion of un otro malesa.
Pero no ta solamente airco. Tin problema tambe cu riolering. Ya caba den menos di 4 luna, dos biaha caba e trahadonan a wordo manda cas pasobra w.c ta bay over, sushi ta sali, holo ta mata y esey ta algo inhumano, a splica.
Diaranson e miembronan di SADA a bisa ta basta. Supuestamente e airconan ta nobo, pero tin caba cu e compressor ta kima. Ta pagando e huur tur luna, pero no ta haya e servicio di e doño di e edificio, a remarca.
No ta pasobra e director a bisa cu el a sinta den calor siman pasa cu e trahadonan tambe tin cu bay pasa den esey. Ta algo inhumano. No ta na su luga con e hendenan ta wordo trata.
A informa minister tambe varios biaha caba di e situacion. Pero Maduro ta kere cu a yega momento pa bin cu un solucion structural, Edward Maduro a duna di conoce.
Tin hopi cos tumando lugar pero no sa ki dia e situacion aki ta caba, a bisa.
