E prijs di dolor di un mucha ta topico principal pa mundo

The content originally appeared on: Diario

ORANJESTAD (AAN) — Atrobe nos a alcansa e momento, cu mundo ta papia di e dolor di mucha.

Pa comprende dolor di e mucha, mester regresa na e balor di hende, cu cerca e grupo cu no por percura pa su mes, ta bira visibel.

Mucha ta bira victima di hende cu no tin of no kier tin e capacidad pa duna prueba cu el a nace como ser humano, cu ta distingui su mes di bestia pa su habilidad di pensa pa su mes y tuma decisionnan cu ta afecta henter mundo.

Na e momentonan aki por mira cu na cantidad di pais ora papia di dolor di e mucha, ta papia tambe di actitudnan cu mester cambia pero tambe sin mas ta permisibel pa mucha.

E dolor di mucha na zonanan di guera cu ta aumenta diariamente rond mundo, ta sostene e fuente di dolor humano, di cual e mucha mas cu tur hende ta bira victima pasobra e no por defende su mes.

Na casnan di famia kibra, e mucha den silencio ta yora si e no ricibi e armanan cu familiarnan y comunidad ta brinda, pa evita cu e ta bira victima di situacionnan pa cual e mes no a pidi.

Na e momentonan aki na varios pais, medidanan serio ta wordo tuma contra situacionnan cu ta haci, cu muchanan por bira victima di inventonan moderno, cu ta haci cu e mucha por drenta den contacto cu peligro pa su bienestar of cu e mucha por bati alarma of ricibi asistencia ora esaki ta necesario.

Continuamente hopi palabra ta wordo dedica na e dolor di mucha den nos tempo moderno, pero solucion no ta sconde den palabra pero den aceptacion di tur hende di e responsabilidad cu nan tin enfrente hende mas vulnerabel, hende cu no por defende nan mes contra crueldad, cu den e mundo cu ta yama su mes moderno, ta parce di kier supera loke ta wordo considera primitivo.

Por dedica hopi palabra na un topico cu ta asina facil pa comprende. Pasobra tur hende ta nace como mucha y tur hende ta na haltura di loke un mucha mester pa e por sinti mes feliz y habri caminda pa un bida, den cual e por goza di su felicidad.

Den un mucha mundo ta dicidi pa su futuro. Loke haci awe cu e mucha, lo bira base pa norma pa futuro, cu lo ta den man di e mucha cu lo crece y colecta su pakete di norma y balor a base di e experencianan di su bida.