‘Si gobierno kita BBO for di gasolin e pregunta ta ‘for di unda nos ta bay corta?’

Minister Gerlien Croes:

• Pasobra e ta un ingreso cu presupuesto aproba riba dje 

ORANJESTAD (AAN)-- Minister Gerlien Croes a splica, den entrevista cu DIARIO, cu si gobierno kita BBO for di prijs di gasolin, e pregunta cu ta surgi mesora ta: “For di unda nos ta bay corta? Pasobra e ta un ingreso na e momentonan aki, cu presupuesto aproba riba dje”, e mandatario a bisa.

  El trece dilanti cu como gobierno nan a scoge pa duna casi 500 Florin adicional na reparatie toeslag, y e placa aki ta bin di un caminda.

   “E ta bin di e propio belasting betalen. Si nos ta bisa cu nos kier kita BBO di algo y den e caso aki specificamente di e prijs di gasolin, anto nos tin cu tuma e decision cu nos ta kit’e for di otro caminda. Esey ta realidad! Di unda nos ta bay corte? Esey ta e pregunta cu nos tin cu bay Parlamento cu ne, y puntra nan den cuadro di e presupuesto cu nos ta presenta na unda nan ta sinti cu nos por corta, y kico nos por haci”, Minister Gerlien Croes a señala.

E dignatario a sigui bisa cu den locual ta e aparato gubernamental, cu e mes ta manehando aworaki, el a haya peticion recientemente, pa ocho klas asistent cu na e momento aki no ta presupuesta. “Pasobra tin muchanan cu necesidadnan special cu ta den klas cu e juffrouwnan no por atende cu nan. Kiermen, si mi conta e ocho asistentenan aki, si mi busca un begroting pa nan, eynan caba mi ta sobrepasa por lo menos un 300 mil of 400 mil na salario, si no ta mas, pasobra un klas asistent costa hopi placa pa aña, anto bay conta ocho mas...” Minister Gerlien Croes a indica.

   E dignatario a splica cu locual ta importante pa papia na un manera abierto di dje, ta cu e necesidadnan den gobierno ta hopi grandi, y e mes ta purbando den formanan innovativo, wak si nan por inverti den sistemanan digital, y di AI, pa yuda agilisa cierto trabaonan, pero sistemanan proteha, cu ta cera, cu gobierno por uza, y cu ta priva den e caso aki. “Pasobra enberdad bo kier wak si bo por agilisa cierto trabaonan, cu bo no ta dependiente solamente di e capacidad humano. Kiermen, e necesidadnan ta grandi tur caminda, kiermen si nos ta bisa ‘nos ta kita belasting di algo’ esey kiermen cu automaticamente gobierno ta perde un entrada, a base di locual ta e operacion di Aruba, anto nos tin cu wak e ora ey, unda nos ta corta”, Minister Gerlien Croes a reitera.