The content originally appeared on:
Diario
Un persona cu ta haci su trabao cu amor y comprension
ORANJESTAD (AAN): Nan a bisa Thairine Backer, cu tin un supuesto reunion na Hunta di Directiva y e no tabatin ningun idea cu na mes momento tabatin colega decorando den e sala di reunion cerca di dje. E no a sospecha nada di e sorpresa te ora el a drenta compaña pa Hunta di Directiva y a mira coleganan y alavez ex-directornan di Dr. Horacio Oduber Hospital presente.
Thairine merecidamente a sali empleado di luna di april 2024. Presidente di Hunta di Directiva sr. Jacco Vroegop a bisa cu nan ta contento di tin Thairine den e team di HOH y cu e sigur ta un ehempel di nos norma y balornan. E ta haci s trabu cu hopi dedicacion, integridad y pasenshi.
Thairine tin calidad na pecho y den tur e trabao cu Thairine ta ehecuta e ta tene cuenta cu esaki. E ta un super teamplayer y tur hende sa unda por hay’e. Desde 2016 e ta traha como mediador di keho, y mirando su trayecto na HOH e conoce tur hende y sa e procesonan. E ta involucra tur colega cu ta necesario pa soluciona cualkier problema y ta yuda unda cu ta cu nan mester di dje na HOH. Ningun peticion ta dimas pe y semper e ta cla pa ricibi feedback. Mehoracion ta un di e palabranan top den su vocabulario y e ta tuma su trabao hopi na serio.
E ta un persona accesibel den tur aspecto y semper cu hopi respet den su trato na pashent y famia. E tin profundo conocemento di cuido medico como cu e mes a traha como enfermera pa mas di 35 aña. Pues e tin tremendo comprension y empatia pa loke ta e parti di salud. Su profesionalismo den tur aspecto ta sigura un ambiente safe y confortabel pa duna contesta, haci pregunta y duna feedback. E ta keda profesional y calmo den tur situacion y ta tene hopi cuidou ken pa inclui den un ‘investigacion’ pa asina garantisa e privacidad di pashent y famia. Ademas, e ta un colega proactivo cu hopi empatia y ta pensa con por yega hunto na un solucion.
Ademas, e ta e colega pa bo acerca tocante historia di Hospital. E tin un archivo grandi di potret y informacion di antes cu e ta gusta comparti.
Thairine tin talento pa su funcion y tin un enorme dedicacion pe. Su compromiso pa solucion y y e manera di ehecuta su trabao claramente ta demostra cu e merece e bunita reconocemento aki. Hunta di Directiva, management y coleganan ta hopi gradicido di tin Thairine den e team y ta spera cu e keda hopi mas aña cu nos. Pabien Thairine cu e bunita titulo aki di empleado di luna di april 2024.
