The content originally appeared on:
Diario
Ta pronostica 23 tormenta di cual 11 por bira horcan
*Preparacion mester cuminsa prome cu 1 di Juni
ORANJESTAD (AAN): E temporada di horcan den Atlantico di e aña aki ta wordo pronostica pa ta “extremadamente activo” cu formacion di alomenos 23 tormenta, di cual 11 lo por bira horcan y cinco di nan lo tin un intensidad mayor, cu bientonan cu ta cuminsa for di 111 mph (178 km/h), segun un pronostico di Universidad Estatal di Colorado (CSU).
P’esey, cu e academia ta conta 23 fenomeno, Oficina Nacional di Administracion Oceanico y Atmosferico (NOAA) ta dispone di 21 nomber pa asigna.
Alberto, 2. Beryl, 3. Chris, 4. Debby, 5. Ernesto, 6. Francine, 7. Gordon, 8. Helene, 9. Isaac, 10. Joyce, 11. Kirk, 12. Leslie, 13. Milton, 14. Nadine, 15. Oscar, 16. Patty, 17. Rafael, 18. Sara, 19. Tony, 20. Valerie y 21. William.
Segun e pronosticonan di Departamento di Ciencianan Atmosferico di CSU, e combinacion di e regreso di fenomeno di ‘La Niña’ den Pacifico y e “temperaturanan record” di e superficie di lama lo genera un temporada di horcan mas cu normal e zomer y herfst aki.
Influencia di La Niña “Cu e señalnan favorabel di un Atlantico calido y un probabel desaroyo di La Niña (cu tin tendencia na disminui biento di west na nivelnan mas halto di atmosfera), e team di pronostico tin un certeza mas cu normal cu e temporada di horcan 2024 den Atlántico lo ta hopi activo.
Un Atlantico hopi calido, sigur, ta facilita e formacion di un promedio mas halto di horcan ya cu e fuente di combustibel di un horcan ta e awa calido di oceano”, ademas di influencia “un presion atmosferico mas abao y un atmosfera mas instabil.
Te awor, e temporada di horcan di 2024 tin caracteristicanan similar na esun di 1878, 1926, 1998, 2010 y 2020.
E horcan mas destructivo di temporada di horcan di Atlántico den 2023 tabata Idalia, cu a toca tera cu un intensidad di categoria 3 den region di ‘Big Bend’ di Florida, unda a causa ocho morto directo y mas di 3,000 miyon dollar na daño.
E informe tambe ta inclui un 62% di probabilidad cu un horcan di categoria mayor (3,4 of 5 riba e scala di intensidad Saffir-Simpson) lo toca tera na costa di Merca e temporada aki, mientras cu e promedio durante 1880-2020 tabata 43% i un 66% di probabilidad pa Caribe.
Na costa este di Merca e probabilidad c’un horcan ta impactá ta 34%.
E team di CSU lo publica actualisacion di pronostico riba 11 di juni, 9 di juli y 6 di augustus.
Den un temporada di horcan promedio di Atlántico ta forma 14 tormenta tropical cu nomber y 7 horcan, di cual 3 ta bira categoria mayor.
Manera tur aña, investigadornan di CSU ta conseha residentenan den zona di costa pa tuma e precaucionnan adecua.
E temporada di horcan ta inicia 1 di juni proximo y ta caba 30 di November.
Algun cos cu por haci pa prepara pa e temporada di horcan:
– Prepara pa horcan manera check e dak di bo cas y rond di bo propiedad si tin algun peliger.
– Tuma medida basico awor pa asegura cu bo ta safe si un tormenta sosode.
– Haya suministronan di emergencia.
– Traha un plan.
– Prepara pa evacuacion.
– Proteha e personanan mayor.
– Proteha bo animalnan domestico.
