Temblor pisa di riba 7.2º registra cerca islanan ABC

Destruccion na Venezuela

ORANJESTAD (AAN): Diaranson atardi pa 6:04 pm, un temblor super fuerte a keda registra net dilanti costa di Venezuela, den area zuidoost di islanan ABC.

   Epicentro: E epicentro a wordo localiza na 10.38º Nort y 68.52º West.  Esaki ta na un distancia di 186 km Zuid-Zuidwest di Willem Toren (parti mas zuid di Bonaire).  E ta igual cu 97 km Zuid-Zuidoost di Willemstad (Curaçao).  E ta igual cu 270 km Zuidoost for di Baby Beach (San Nicolas) na Aruba.

   E ta distancia di 59 km Noord-Noordwest di Valencia (estado Carabobo), y tambe 98 km West-Noordwest di Maracay (estado Aragua), y 172 km West di Caracas (distrito capital).

   E tabatin un magnitud super pisa di 7.2 º riba Scala di Richter cu ta uno destructivo cu ta destrui edificio.

   Destruccion: Na Bonaire, emisoranan a raporta cu hendenan ta yama pa informa cu nan a sinti e sacudimento fuerte.  Na Aruba, DIARIO a ricibi di algun lector na San Nicolas cu nan a sinti algo.

   Destruccion fuerte ta loke Venezuela a pasa aden, y tanto coriente y internet a cay den cierto area di estado Falcon, estado Aragua y parti nort di estado Carabobo.  Gobierno Venezolano a pidi comunidad pa keda calmo pa asina autoridad por haci su trabao.  Tin indicacion di hopi edificio destrui, incluyendo partinan importante di Aeropuerto di Maiquetia na Caracas cu a keda bastante impacta, y a drenta informe di hende cu a perde nan bida.