The content originally appeared on:
Diario
E boto cu a yega Urirama tin 3 outboard engine
ORANJESTAD (AAN): Manera cu DIARIO a trece dilanti den edicion di Diaranson, e boto cu droga cu a ser intercepta na boca di Urirama na costa nort di Aruba, tabata topico di combersacion tur caminda.
Wardacosta di Caribe Hulandes a indica cu nan a detecta e boto aki riba radar, ora cu ya e tabata moviendo parti Noordoost di Aruba. Mesora nan notifica Cuerpo Policial di esaki, pa asina a sigui vigila e movimento.
Finalmente e boto a drenta na boca di Urirama, y un cantidad di patruya di Polis a mobilisa pa e area aki, cu ta keda net un tiki mas pariba di Boroncana.
E prome unidad di Polis a yega, a bin topa cu e boto cu por mira riba e potret aki. E ta un boto tipo Yola cu tin 3 Outboard Engine, paden tabatin como 6 pa 7 jerrycan di plastico conteniendo gasolin. E boto no tin nomber, ni nada di matricula.
Eynan a detene mesora un persona cu tabata na e Boca. A tuma nota cu tabatin ya diferente bulto cu droga cu a wordo baha di e boto y poni abao den cercania, sperando riba e traficantenan local cu mester busca e droga. Pero nan lo a mira Polis y pues a keda leu.
Polis a bin haya 3 hende si mas den cercania. A identifica dos di e hombernan aki di nacionalidad Colombiano, y dos otro ta di nacionalidad Venezolano.
Polisnan a seya e lugar, y ora cu solo a sali ainda nan tabata vigilando e area, pasobra kier a rista e lugar rigurosamente cu yudansa di claridad di solo. Ministerio Publico a duna ordo pa confisca e boto pa investigacion. E droga a wordo confisca, y mientras tanto ya caba a wordo destrui. Te ainda oficialmente, ni Polis, y tampoco Wardacosta di Caribe Hulandes, no a divulga e peso di e droga confisca.
