Tata di Parlamentario Stephany Sevinger sentencia na 4 aña di prison pa e corupcion historico den caso Avestrus

Parlamentario Endy Croes:

ORANJESTAD (AAN): Parlamentario Endy Croes di Fraccion di MEP a comenta riba conseho di Abogado General di Hulanda kende a duna su conseho diamars 3 di februari 2026 na Hoge Raad. Despues di e veredicto aki no tin ningun caminda legal mas pa cana y Benny Sevinger lo mester presenta su mes na porta di KIA.

   Manera ta conoci Benny Sevinger tata di Stephany Sevinger actual Parlamentario di AVP a wordo investiga den caso di corupcion historico di mas grandi cu Pais Aruba a conoce pa locual ta trata corupcion den entre otro otorgamento di tereno na Aruba. Durante aña 2010-2017 Benny Sevinger tabata faborese amigonan cu tereno y a keda prueba den corte cu el a enrikece su mes cu e practica aki.

   Repasando algun pasada den e veredictonan di Benny Sevinger: Hues a comproba cu amigo y man drechi di Benny Sevinger tabata tin 2.4 miyon Florin cash riba un cuenta na ORCO Bank na Curaçao procedente di entre otro comision ricibi di terenonan bendi. Hues a incauta y a kita ful e placa aki di nan cuanta bancario.

   Hues a comproba cu atrabes di e amigo aki Benny Sevinger a ricibi masha hopi fabor entre otro a cumpra Gym Vectra di 20.000 pa regala Benny, a paga un drip system di mas di 25.000 Florin pa cas di Benny, a paga y regale un hekwerk di mas di 15.000 Florin y asina por sigui cu e lista cual ta para den e sentencia. No mester lubida Leoncita cu tambe a strica den caso Avestrus. Pa locual ta sospechosonan Leoncita Arends di Canal 90 y tambe Sussebeek kendenan a wordo condena entre otro pa omkoping di e minister e conseho di Abogado General no a desvia di nan castigo ricibi den Hoger Beroep y a conseha pa laga e castigonan aki igual.

   Sentencia den Hoger Beroep 12 di Juli 2024: Benny Sevinger di AVP a wordo condena pa (3) Hues entre otro pa complicidad di estafa di Pais Aruba, corupcion pasivo y malversacion. Despues cu Benny a ricibi su promer condena den eerste aanleg unda (1) Hues a duna e veredicto (14 di April 2023), Benny Sevinger a opta pa bay Hoger Beroep y akinan (3) Hues a revisa e caso y a aumenta e castigo di prison na 4 aña (12 di Juli 2024). Benny Sevinger a dicidi cu e lo bay Cassatie na Hulanda pa (5) otro Hues revisa e caso. E caso Avestrus ta un caso hopi serio, cu acusacionnan hopi grave contra Benny Sevinger ex minister di AVP di pais Aruba. Su actonan a kibra e confianza cu pueblo mester por tin den un gobierno. Abogado General di Hulanda ta duna su conseho final 3 di februari 2026 y a pidi pa mantene 4 aña di prison.

  Abogado General den un proceso di Cassatie: Den e proceso aki di Cassatie un Abogado General ta revisa ful e caso independientemente y ta traha un analisis huridico y conseho final. Diamars 3 di Februari 2026 e Abogado General a saca su conseho y analisis di e caso Avestrus unda ta conseha (5) Huesnan di Cassatie, kendenan lo duna e sentencia final, pa mantene e condena di prison di 4 aña (48 luna) di Hoger Beroep. Segun Abogado General Paridaens ta splica cu ta considera e kehonan cu Benny a entrega na Cassatie  como infunda. Tambe e ta splica cu HOF a demostra cu prueba “feiten” e culpabilidad di e ex minister Benny Sevinger. Den 99% di casonan di Cassatie e (5) Huesnan ta sigui e conseho di e Abogado General. Esaki ta parti di e proceso cu ta yegando poco poco su final. Dia 14 di April 2026 Cassatie (Hoge Raad) (5) Huesnan lo duna e veredicto final.

   Banda di e castigo di prison tin un otro sentencia contra Benny Sevinger di 7 di april 2025 unda Hues a dicta den ontnemingszaak cu Benny Sevinger mester paga Land Aruba bek 840.000 Florin of bay extra 900 dia sera na KIA pa e beneficio financiero cu el a ricibi den e caso di Mega Corupcion Avestrus. Akinan OM a prueba cu Benny Sevinger a gasta 840.000 mil mas cu su entradanan oficial registra y Benny no por a prueba lo contrario di unda e placanan aki a bin. Sigur un parti hopi scur lo keda graba den historia y un otro mancha preto riba partido AVP e partido conoci den boca di pueblo como e Universidad di Corupcion.

   Conclusion: Na final di dia, mentira tin pia cortico y e berdad tin e peso di ley. Pais Aruba no por wordo goberna mas pa e cultura di 'amiguismo' y enrikecimento ilicito cu a marca e era di Avestrus. Ta facil pa señala cu dede ora bo kier desvia atencion di bo mesun picanan. Mientras cu e famia Sevinger ta ocupa nan mes cu pone potret di otronan, e realidad ta cu e unico potret cu pronto lo ta den e registro di KIA ta esun di Benny mes.

   Mientras otronan ta dedica nan energia na campañanan di desprestigio, nos ta keda enfoca riba transparencia. Pasobra un cos ta sigur: bo por purba tira lodo cu nomber y cu potret, pero bo no por laba un sentencia di 48 luna di prison. Husticia a tarda, pero e no a lubida.