ORANJESTAD (AAN): E Taskforce di Reino pa Derecho di Mucha a lansa su propio website dia 1 di juni 2021.
A lanta e Taskforce aki na 2014 cu e meta pa stimula cooperacion den Reino, riba tereno di derecho di mucha. Comparti conocemento, crea conexion y cooperacion entre paisnan ta e obhetivo principal.
E paisnan miembro di e Taskforce ta: Aruba, Curaçao, St. Maarten y Hulanda, ademas di e entidadnan publico di Bonaire, St. Eustatius y Saba.
E website cu a caba di lansa ta fungi como plataforma cu informacion actual tocante derecho di mucha na e seis islanan y ta destina pa comparti conocemento y stimula cooperacion entre tur miembro di Taskforce y otro stakeholder.
E website ta contene principalmente informacion dirigi na profesionalnan cu ta traha pa y cu mucha y hoben den tur area di trabao, for di educacion te husticia.
Pa wak e site y pa informacion adicional por bay na www.tfkinderrechten.info pa e version na Hulandes y www.tfchildrights.info pa e version na Ingles.
Alavez Taskforce ta pidi tur profesional den Reino cu ta traha pa y/of cu mucha y hoben pa registra via e website pa ricibi e boletin di informacion cu lo sali tur kwartaal. Si ta trata di un profesional cu a yega di asisti na un di e conferencianan di Taskforce den pasado, e persona aki lo ricibi e boletin di informacion automaticamente.
Related News
Rescate milagroso 20 aña pasa
E triki den un supermercado pa bende gelatina pasa di fecha cu hasta a daña
SMAC ta haci apelacion na gruponan di Carnaval pa keur tur vehiculo na tempo
