Reduccion di prijs di gasolin y diesel lo tin un impacto directo riba inflacion y poder di compra

The content originally appeared on: Diario

ORANJESTAD (AAN):   Minister Geoffrey Wever a expresa dialuna mainta durante un conferencia di prensa cu el a firma e ministeriele regeling

cu ta bay haci aplicabel cu entrante 10 di Augustus, e prijs di gasolin y diesel lo baha substancialmente.

            El a agrega cu gobierno ta contento pa wak cu e prijsnan internacional a cuminsa stabilisa y cu por ripara un bahada directo na Aruba tambe. Esaki ta bay tin un impacto directo riba inflacion y e poder di compra di cada ciudadano na Aruba.

            E mandatario a agrega cu gobierno ta contento di mira esaki pasobra sa cu e peso ta hopi grandi y no tin espacio mas pa absorba aumento di costo di bida. Prijs di gasolin y diesel ta algo cu ta forma un parti esencial di e patron di consumo di cada ciudadano. Esey ta nifica cu e bahada aki, inmediatamente cada ciudadano lo bay wak e efecto positivo den su cartera, a enfatisa.

            Finalmente, el a expresa cu ta spera cu e tendencia aki continua. E ahuste aki ta pa e proximo 4 simannan. A mira un aumento drastico durante basta luna tras di otro. Pesey ta contento di mira cu aworaki tin un reduccion den e prijs aki, pendiente di e desaroyonan internacional riba e topico aki.