Prijs di rijles lo bay subi na diferente rijschool

The content originally appeared on: Diario

Vereniging Rijscholen Aruba a anuncia aumento  

*Costonan di operacion ta subiendo 

ORANJESTAD (AAN):  Rolando Maduro, Presidente di Vereniging Rijscholen Aruba (VRA) hunto cu secretario Tomas Ruiz a yama un rueda di prensa pa trece dilanti algun topico relevante riba cual nan kier hala atencion di comunidad.

            Maduro a indica cu e prome punto ta e aumento di e costonan di operacion di e rijscholen y e di dos ta e independisacion di Examen Rijbewijs cu tambe VRA ta preocupa cu ne.

            Riba e prome aspecto, Tomas Ruiz a señala cu e gastonan operacional ta subiendo y akinan ta papiando di gastonan di gasolin. Na Juni 2022 a wak un aumento di 32.2 cen pa liter. Luna pasa a haya un aumento di 14.5 cent pa liter.

            Piesanan pa auto tambe ta un tiki mas caro mescos cu labornan di mecanico. Awa a caba di subi na 32 % y coriente na 23.9 %. Comestibel ta subiendo y asina el a sigui menciona otro rubronan cu a conoce aumento recientemente, a splica.

            Ruiz a agrega cu tur esaki lo bay tin influencia riba e prijs operacional di e rijscholen. El a compara e ultimo prijsnan cu nan a haya for di nan coleganan na Hulanda (24 les di teoria y un practica) cu ta costando actualmente 1300 Euro.

            Na Corsow, por ehempel, pa 10 les cu ta rond di 2 di teoria y 8 di practica, ta saliendo rond di 750 florin. Por mira cu e prijsnan ta mas halto y cu por cierto, na Corsow ainda no tin sistema digitalisa, a remarca, manera cu tin na Aruba unda tin examen oral y examen digital.

            Na Hulanda ta duna les na hulandes so, a bisa, mientras cu na Aruba ta duna les y e examen ta den 4 idioma.

            Tomas Ruiz a expresa cu pa e motibo aki e prijs lo bay subi pa diferente rijschool. Cada rijschool ta liber pa pone aumento na unda e ta haya cu ta necesario. Pesey esaki ta un aviso publico pa despues no keda sorpresa cu e prijsnan di tur otro negoshi lo subi, a enfatisa.

            Actualmente, esnan cu mester pasa examen ta haya diferente pakete di les riba mercado y lo por wak un ahuste di prijs rond di 100 florin, a indica. E cambio tambe lo por wordo refleha pero den e cantidad di minuut cu e lesnan ta dura.