Super Doit Center ta invita comunidad pa pasa haci un donacion pa Fundacion pa Nos Comunidad na e ‘Kiosco di Donacion’

​

Lisanne Coffy, Marketing Coordinator:

ORANJESTAD (AAN):   CEDE Aruba hunto cu partner IBS Group y Super Doit Center  a introduci un Kiosco di donacion na e supermercado cu e intencion di otorga e fondonan recauda na instancianan local cu mester di sosten.

            E ta un proyecto masha innovativo. Unico na Aruba ya cu na e momentonan aki, tur donacion ta wordo haci pa medio di boxnan cu ta wordo poni na entre otro supermercadonan.

            E proyecto piloto aki ta uno caminda pa medio di tecnologia, por swipe cu debit card of credit card na e POS Terminal a ubica na Super Doit Center y asina ta ehecuta e donacion, cual por varia entre 5 te cu 30 florin.

            Aworaki, e prome instancia asigna pa haya e fondonan pa medio di CEDE Aruba  ta Fundacion Pa Nos Comunidad. Despues di 3 luna, CEDE lo scoge un otro instancia na cual lo haci e donacion di e fondonan recauda.           

            Bryan Krozendijk, Business Process Officer di CEDE Aruba a bisa cu e proyecto di ‘Happy to Give Back’  ta parti di e proyectonan innovativo cu nan ta uza pa por yuda e diferente instancianan.

            Pa medio di ‘Happy To Give Back’ a ‘setup’ un plataforma unda cu turistanan y localnan tambe por a haci donacion pa yuda durante pandemia di Covid.

            E proyecto aki a resulta exitoso y ora e situacion a normalisa a cera e proyecto y recientemente IBS a acerca nan y presenta e proyecto piloto di un kiosco di donacion. Asina a dicidi di traha hunto y yuda e fundacionnan local pa medio di donacionnan digital, Krozendijk a splica.

            Fundacion Pa Nos Comunidad  a acepta di biaha pa ta e prome fundacion participando den e programa aki.

            Trahado Social di FPNC, Gabriel Marchena a expresa cu nan ta yudando entre 300 pa 350 famia  den necesidad  y nan ta sumamente contento di forma parti di e proyecto piloto aki. A bisa cu cada donacion ta conta y no ta importa con chikito e ta, pero cada cen aporta lo bay pa yuda un famia den necesidad.

            Lisanne Coffy, Marketing Coordinator na Super Doit Center a duna di conoce cu ora cu a acerca e compania cu e proyecto aki, a acept’e cu man habri. E ta algo full diferente locual ta pas cu nan manera di opera, ya cu ta innovativo, moderno y algo atractivo.

            El a bisa cu ta importante pa e compania contribui cu fundacionnan cu mester di ayudo. “Nos di Doit Center kier a invita tur hende, tur cliente pa pasa wak e kiosk aki y haci un donacion. Ta super facil y hopi leuk.