The content originally appeared on:
Diario
Un total di 100 mil florin a keda entrega
ORANJESTAD (AAN): Durante e anochi aki, cual a tuma lugar na Renaissance Conference Center, a haci donacion di un total di cien (100) mil florin. Ademas tin un 25 mil florin reserva pa proyectonan cu ta pendiente durante 2024.
Presidente di Quota Internacional of Aruba 2023-2024, Ivy Simon, tabata encarga pa entrega e donacion nan y a expresa cu e ta gradici tur esnan cu a contribui na Quota su exitoso fundraiser “Denim & Bling” di November 2023 cu un donacion. Un danki di curason pa tur comerciante cu a contribui tambe na tur persona cu a cumpra ticket pa asisti na e evento, sin nan ayudo e donacion nan lo no tabata posibel. Tambe un danki di curason na e miembronan di e fundraising committee, miembronan di e donations committee y na tur e miembro nan di Quota pa nan cooperacion y contribucion.
E organizacionnan cu a recibi un donacion tabata: Fepoh, Wit Gele Kruis, Scol Soeur Juliette, Mickey’s Foundation, Sociaal Fonds Colegio Arubano, Fundacion Contra Violencia Relacional, Fundacion Respetami, Colegio Nigel Matthew, Stichting Ambiente Felis, Ban Uni Man pa Cria nos Muchanan, Brighter Future, YMCA Aruba, Adopt an addict, Hospice Atardi, Edmund Harms Foundation, Stichting Schouwburg Aruba, Mary Joan Foundation, Koningin Wilhelmina Kankerfonds, ATHA, Rode Kruis Aruba y Biblioteca Nacional Aruba.
Mayoria di e donacionnan aki ta aproba pa proyecto specifico cu e organizacion tin planea.
Wilhelmina Kankerfonds a haya tambe un donacion special den memoria di Quota su miembro Greta Posner Figaroa, cual a ser entrega na nomber di Quota pa Greta su ruman sr. Jossy Figaroa.
Quota ta informa pa keda pendiente pa mas informacion tocante e siguiente fundraising di Quota.
Diadomingo awor Quota International of Aruba, un service club estableci na Aruba desde 1987, lo tin su “Board Installation Brunch” pa miembro y invitado, unda e club lo pasa e presidencia di 2024-2025 pa Juliska Harms y desde awor caba ta desea Juliska y su team exito.
