Publico por nombra persona pa Condecoracion Real di awor te cu 25 di Juli

ORANJESTAD (AAN): Cada aña Gobernador di Aruba, Su Excelencia Señor Alfonso Boekhoudt, ta otorga e Condecoracion Real na varios ciudadano di Aruba cu a haci un tarea excepcional banda di nan trabao normal.

   Entre otro, trabao boluntario, trabao riba tereno di deporte, asistencia social y mas. Prome Minister Evelyn Wever-Croes ta anuncia cu aworaki tin e oportunidad pa nombra un persona pa ricibi e condecoracion na luna di April 2023, e deadline pa haci esaki ta 25 di juli.

   Procedimento pa nombra un persona: Un persona no por propone su mes, un otro hende mester propone un persona pa e condecoracion. Esaki mester worde haci a traves di un formulario cu mester yena cu ta disponibel na tur FMA na Aruba y Bestuurskantoor.

   Premier Wever-Croes ta splica cu e formulario ta bastante extenso y mester yena bastante informacion pa motibo cu Condecoracion Real no ta worde duna asina liviano. Mester tene cuenta cu tin cierto documento adicional cu tambe mester worde entrega cu e formulario. E formulario por worde entrega te cu dialuna 25 di juli pa e persona cu bo ta admira pa su trabao desplega.

   “Na Aruba tin hopi persona cu curason grandi, cu ta haci bunita trabao gratuito y cu no tur ora ta gusta laga sa kico nan ta haci pa comunidad. P’esey esaki ta bo momento pa propone e persona aki. Ban propone tur nos baluartenan y tur nos boluntarionan cu curason di oro na Aruba, pa nan haya Condecoracion Real,” Prome Minister Wever-Croes a expresa.