The content originally appeared on:
Diario
Prome Minister:
ORANJESTAD (AAN): Diahuebs mainta, Prome Minister Evelyn Wever-Croes a presenta durante un conferencia di prensa di Gobierno, e Relato Anual (Jaarverslag) di su ministerio pa aña 2023. Un di e topiconan cu Prome Minister a cubri e mainta aki, tabata innovacion.
Prome Minister a splica cu pa cu e topico aki den e Relato Anual tin 3 paragraf di cual cada un ta cubri e 3 institutonan cu ta atende cu innovacion den su ministerio. E institutonan aki ta: Aruba Futura Foundation, Directie Informatie Voorzieningen Automatisering (DIA), y Directie voor Innovatie.
1. Aruba Futura Foundation
Futura ta un fundacion cu a wordo lanta pa implementa e vision di innovacion na Aruba. Futura tabata tin varios proyecto bou di su encargo di cual Edutech ta esun cu mas a resalta. E proyecto di Edutech ta ofrece scolnan e oportunidad di gana fondo pa asina por cumpli cu e proyectonan innovativo cu nan a diseña.
2. Directie Informatie Voorzieningen Automatisering(DIA)
E departamento aki ta encarga cu automatisacion di Aruba en general. Den e relato anual tambe ta haya informacion di kico tur a wordo haci cu e departamento aki.
3. Directie voor Innovatie
Prome Minister a indica cu e departamento aki ta uno nobo, y cu a wordo instituti pa atende cu innovacion.
Manera ta conoci, innovacion ta e futuro di nos muchanan y ta di gran importancia, pa sigui ofrece nan e medionan necesario pa engrandece nan conocemento den e area aki. Gabinete Wever-Croes tin e compromiso pa sigui bin cu proyectonan innovativo, yudando asina e futuro generacion pa tin e conocemento necesario pa den futuro por subi e mercado laboral exitosamente.
Pa mas informacion di e Relato Anual 2023 por click: https://issuu.com/gabinetewevercroesaruba/docs/jaarverslag_algemene_zaken_2023
