Proyecto piloto pa espacio berde urbano na Maracastraat

Tarabana tambe den programa nacional di reforestacion

ORANJESTAD (AAN): Diaranson mainta a tuma luga un sesion di plantamento hunto cu e residentenan di Maracastraat den Dakota, como parti di e Programa Nacional di Reforestacion (NRP). E programa piloto aki ta un colaboracion entre Ministerio di Asunto General, Cultura, Ambiente y Naturalesa (MinAZ), Departamento di Obranan Publico (DOW), Departamento di Naturalesa y Medio Ambiente (DNM), y ehecucion di proyecto Watty Vos Boulevard (WVB).

   Prome Minister Mike Eman a indica cu a selecta Maracastraat como un programa piloto pa un modelo innovativo di espacio nan berde urbano cu ta uni restauracion ecologico, renobacion di bario, y participacion activo di comunidad. Residente di e bario, den un encuentro informal sinta den verenda di cas, a comparti nan deseo y conseho. Cual a uza como referencia den planificacion di e programa. Hopi a indica di ta prefera especie di mata nativo, mata cu ta brinda sombra y mata di fruta, sin tapa e visibilidad, pa garantisa siguridad di e area.

   Basa riba e input di e residentenan, Departamento di Naturalesa y Medio Ambiente (DNM) a uza su sistema ecologico Tree Mix Choice pa propone un composicion balansa. DOW a integra e preferencianan di comunidad den e diseño final di plantacion.  Esaki ta e lista di 55 mata uza den plantacion:

   Di Santa Rosa Nursery, a haya 5 Flamboyan, 5 Pal’i Boonchi, 5 Kibrahacha, 5 Huliba, 5 Watapana, 3 Amandel, 3 Macapruim, 3 Druif’i Lama, y 5 Ratonero.  For di Agro Aruba Garden a haya 3 Mispel, y 3 Cashew Cora.

   For di Ronald Slot-Lopes a ricibi 5 Wayaca.  For di Randolph Fingal di SPO, a ricibi 5 Fofoti.

   Tambe residente di bario a trece mata cu nan mes a cuida pa añadi na e espacio, den e espirito di ‘e bon comun’, manera mata di Kenepa, Boneriano, Mango y di Scopapel. E combinacion di especienan aki lo yuda restaura sombra natural di mata, sostene habitad pa parha nativo manera Lora y Prikichi, mehora salud di e tera, y fortalece e resilencia contra calor. Den e añanan cu ta bini, e area lo transforma na un espacio berde, agrababel y sostenibel pa tur habitante di e bario.

   Watty Vos Boulevard (WVB) a prepara e tereno, coba buraconan, y pone gordura disponibel; tambe lo keda responsabel pa mantene y muha tur e plantacion nobo.

   Cu e proyecto piloto na Maracastraat, Aruba ta sigui move pa un futuro cu mas espacio berde urbano y mas resiliente, caminda restauracion di naturalesa y participacion di comunidad ta bay man den man cu otro.

   Un trabao extenso ta tuma lugar ‘behind-the-scences’, pa desaroya e Sistema Tree Mix Choice, pone e base tecnico, planifica pa ‘nursery’ nan pa mata nativo, reuni y tene brainstorm sessions cu stakeholders, fortalice colaboracion entre departamento nan gubernamental, y cu instancia na isla ruman Bonaire.

Riba e fundamento aki Programa Nacional di Reforestacion (NRP) a traha, pilotnan adicional den otro barionan, programa pa 2026. Na banda di espacio urbano nan, tambe den e espacio nan di conservation di naturalesa, unda Aruba Conservation Foundation ta maneha, lo bay bin pilotnan di restoracion cu un enfoke primordial ecologico. Den futuro lo algun di e proyecto nan lo brinda nos bishitante nan di Aruba oportunidad pa por contribui via ‘voluntourism’ na e Programa Nacional di Reforestacion (NRP).