The content originally appeared on:
Diario
E lo ta participando na Polonia
ORANJESTAD (AAN): Durante un recepcion special teni na Les Cappuchinas Cafe & Eaterie na Playa, e organisacion “My Dream Institute Foundation” a duna honor na Prome Ministro Evelyn Wever Croes, pa instala y corona Rashida Schmidt como ‘Miss Supranational Aruba 2024’. E dama hoben di 22 aña di edad ta un modelo y studiante di Ley na Universidad di Aruba, y e ta sinti su mes hopi honra di por bay representa su One Happy Island den e certamen internacional aki cu ta tuma lugar den verano na Polonia.
El a splica cu p’e, esaki ta manera un soño a bira realidad. E anochi tabata uno special di por ta parti di e experiencia Supranational, y e ta cla p’e.
Prome Ministro a indica cu tabata un honor pa a instala e sjerp y despues corona Rashida Schmidt como Miss Supranational Aruba. El a splica di tin un aprecio pa tanto e candidatanan como tambe comisionnan organisador, pasobra a bin nota cu e eventonan aki no ta djis un concurso di beyesa, sino e ta acapara un preparacion sumamente grandi pa cada candidata, y e conocemento y habilidad cu e mester tin pa representa e isla riba escenario. “Mi tin respet enormemente grandi pa organisacion cu ta stimula nos hobennan pa haci esaki. Cada un candidata cu representa e isla den exterior, ta un Embahador di Aruba.”
E simpatica Susanita Diaz-Maduro di My Dream Institute Foundation a hiba palabra tambe y a indica cu den pasado el a yega di wordo corona na Hulanda, y pa no tin mal entendimento, a dicidi na haci pa prome biaha coronacion di un candidata cu lo bay participa na Miss Supranational aki algun luna na Polonia. Palabra di exito di awor caba na Rashida. .
