The content originally appeared on:
Diario
Minister Glenbert Croes cu solucionnan
Structura di salario ta bay cambia
Lo trece husticia salarial a base di e costo di bida
ORANJESTAD (AAN): Gobierno di Aruba a bin ta aumenta salario minimo periodicamente y den cuadro di esaki, Minister Glenbert Croes a duna di conoce cu awor e structura di salario ta bay cambia tambe.
E mandatario a laga sa cu awor ta bay paga salario minimo pa ora, a base di 40 ora. Anteriormente un persona tabata traha 40 ora of 45 ora y e ta wordo paga salario minimo. Awor no, a remarca. Si un persona ta traha 40 ora, e salario minimo ta wordo defini pa ora y ta bira caso 2 mil florin. Pero si bo traha mas cu 40 ora, mester paga bo e oranan extra.
Cu e ahuste aki ta haciendo un coreccion metodico di calculacion cu ta haci cu finalmente tambe salario minimo, dia cu e ‘minimum uurloon’ wordo aproba y e cambio di ley tuma luga, e ta bay yega 2 mil florin, Minister Croes a duna di conoce.
E mandatario a agrega cu ta trahando riba un solucion pa tambe e resto di trahadonan cu ta den otro structura salarial, cu no ta salario minimo. El a bisa cu pa esaki mester bin cu categorianan di salario. Diferente conseho a ser ricibi riba con por yega na un sorto di categorianan di salario den diferente funcion.
Minister Croes a agrega cu hopi biaha ta sinti cu tin hendenan cu ta cay den funcionnan halto cu no ta wordo paga acorde cu nan funcion y responsabilidad.
Pa hopi hende nan salario minimo a bira nan salario maximo y esey no ta e intencion. E idea ta pa tin un liña di progreso salarial cu tur hende tin derecho riba dje. Gobierno mester defini e rumbo ey, e minister a expresa.
Ahustacion di costo di bida, den sector priva ta suppose di ta regla via contratonan colectivo (CAO) of den e contrato entre e doño di trabao cu e trahado. Den caso cu no tin esaki, a remarca, mester bay wak si ley laboral por trece claridad riba esey.
Ta den proceso pa revisa tur e leynan laboral cu a wordo cambia na 2013 pa asina inclui esey y asina trece husticia laboral den loke ta ahustacion salarial, a base di costo di bida, Minister di Labor, Integracion y Energia, Glenbert Croes a indica.
