Presidente di Parlamento ta indica cu Parlamento a amplia su capacidad di seguridad paden

​

Despues di a ricibi menaza:

ORANJESTAD (AAN) – Presidente di Parlamento mr. Edgard Vrolijk, den entrevista cu DIARIO a referi na un amenaza cu Parlamentarionan a haya, pa motibo di e ley di matrimonio di mesun sexo.

Presidente di Parlamento a declara cu no ta solamente pa motibo di leynan, pero diferente biaha Parlamentarionan ta wordo menaza pa cualkier trabao cu nan ta haciendo of cu nan a critica.

Vrolijk no kier a menciona nomber di persona, pero e ta condena si, e tipo di actonan asina, pasobra parlamentarionan tambe ta tata, mama, miembro di un famia, y ora nan ta expone na cosnan asina nan ta expone nan famia tambe.

Amenazanan ta impedi un parlamentario haci cierto cosnan cu generalmente e ta haci, y como poblacion, mester stop cu e cosnan aki.

El a corda kico a pasa na Curacao cu un Parlamentario algun aña pasa y esaki ta cosnan cu no por permiti den nos pais, pero mester keda leu for di esey. “Nos por tin diferencia di opinion, pero esey no ta duna bo derecho di amenaza un hende y kibra su privacidad tambe, pasobra bo ta pone su famia tambe den panico ya cu tin medidanan ta wordo tuma, bo no por sali un caminda, bo yiunan tin cu keda pendiente unda bo ta bay, unda bo tin cu move, loke no ta leuk tampoco ora bo ta sirbiendo pueblo”, Presidente di Parlamento a señala.

El a reitera cu por tin diferencia di opinionnan pero mester respeta otro tambe, y no ta motibo pa bay amenaza un hende.

Presidente di Parlamento mr. Vrolijk a indica cu durante tur e reunionnan di Parlamento, nan a amplia e capacidad di seguridad pisa, y naturalmente ta keda na cada parlamentario pa haci denuncia y naturalmente, tin bista riba nan. Esey ta trabao, entre otro di Veiligheid dienst y e otro dienstnan cu ta atende cu seguridad nacional di Aruba, y ta atende cu seguridad di e parlamentarionan y ta guia nan den e proceso ey.

“Pasobra con cu bay bin ta guia bo ta keda guia nan, pasobra bo por prepara bo mes pero bo no sa si enberdad e ta un menaza serio, of algo por pasa akiden, pero pafo bo mes tin cu tuma bo precaucionnan”, Edgard Vrolijk a señala.

Dia 18 di Juni cu tin reunion pa sigui trata e tema di e ley, e lo ta porta habri pero bao control severo di polis y CEA, mescos cu a haci ultimo bez, ta atende cu tur hende, y naturalmente e reglanan ta bisa bon cla cu esun cu no por comporta su mes, ta wordo saca pafo, Presidente di Parlamento a conclui.