Polis a confirma cu a detene e yiu di e señora cu a fayece na Calbas

Morto di señora di 72 aña “no ta natural”

ORANJESTAD (AAN): Dialuna dia 25 di mei 2026 pa mas o menos 7:53’or di mainta Central di Polis ta wordo notifica di un caso na Calbas na unda a haya un señora di edad cu no ta duna señal di bida.

   Mesora a manda patruya di polis como tambe Ambulance na e lugar.

   Na yegada di polis ta bin topa cu e yiu homber y e na su turno ta informa polis cu su mama no ta duna señal di bida.

   Ambulance ta presenta eynan, y Paramediconan a haci nan maximo esfuerso pero no por haci nada mas pa e señora.

   Dr. Texier a presenta y ta constata morto di e señora di inicial C.R. Piñero di 73 aña naci na Venezuela.

   Recherche, team forensico di BFTO, y Docter forensico a presenta pa haci e investigacion pa descarta si lo ta trata di un hecho castigabel.

   Despues di un rato a pidi ambulance bek na e sitio pa e yiu homber y el a wordo transporta cu ambulance pa haya tratamento medico.

   Recherchenan di Noord hunto cu polis tecnico y docter forensico a sigui cu e investigacion y na unda a resulta cu lo tin indicacion cu e morto di e señora Piñero no ta natural.

   Mirando e caso serio aki, Recherche a detene e yiu homber E.E.B.P. naci na Venezuela di 44 aña relacion cu e caso encuestion.

   Cuerpo Policial Aruba ta manda palabra di condolencia na famia di e fayecido.