Aruba a introduci Mildred Schwengle como minister plenipotenciario na Hulanda

Den luga historico di Nieuwe Kerk na Den Haag

• A conmemora 40 aña di Status Aparte y 50 aña di Himno y Bandera 

ORANJESTAD (AAN): Den un ceremonia elegante den Nieuwe Kerk na Den Haag, Gobierno di Aruba a instala oficialmente señora Mildred Schwengle como Ministro Plenipotenciario di Aruba na Hulanda. E anochi especial a reuni un amplio grupo di invitadonan distingui, incluyendo embahadornan, representantenan diplomatico, miembro di Parlamento Hulandes, lidernan politico, representantenan di Reino Hulandes y huespednan di diferente sector di sociedad Hulandes y Caribe Hulandes.

   Minister mr. Gerlien Croes y Minister mr. Geoffrey Wever tambe tabata presente rib’e atardi importa pa nos isla na madre patria. E ceremonia a tuma luga den un atmosfera di orguyo nacional y reflexion historico, caminda tambe a conmemora 40 aña di Status Aparte y 50 aña di Himno y Bandera di Aruba.

   Durante su discurso, Prome Minister mr. Mike Eman a enfoca riba e significado profundo di servicio publico, cooperacion den Reino y e necesidad di sigui construi relacionnan basa riba respeto mutuo y interes comun. Vice-premier Gerlien Croes a felicita Ministro Plenipotenciario Schwengle cu palabranan di pabien, describiendo su persona cu experiencia, inteligencia, cordialidad, dignidad y un profundo comprondimento di nos hendenan. Prome Minister Eman a dedica atencion na e significado di Reino Hulandes y e balor moral di e Statuut pa Reino.

   Referando na reflexionnan cu e y su ruman defunto, e prome Prome Prome Minister di Aruba Henny Eman, a publica anteriormente, Eman a bisa cu e preambulo di Statuut ta contene “un vision moral extraordinario” cu ainda tin hopi relevancia awe. Durante e anochi, diferente invitado a expresa aprecio pa e mensahe di unidad, cooperacion y “Common Good” cu tabata central den e discurso di Prome Minister Eman.  Minister plenipotenciario Schwengle a subraya e esfuersonan cu Aruba ta haciendo ultimamente pa establece un centro di Wageningen University & Research como tambe un EU preclearance den cooperacion cu Schiphol, KLM y Hulanda.

   Gobierno di Aruba ta considera e instalacion di señora Schwengle como un paso importante den fortalece e relacionnan diplomatico entre Aruba y Hulanda y den construccion continuo di un Reino basa riba respet, dignidad y colaboracion entre tur su paisnan.