The content originally appeared on:
Diario
Partido MEP a reacciona
ORANJESTAD (AAN): Votadornan y campañadornan di MEP a pidi aclareaccion di locual ta socediendo den Parlamento entre Presidente Edgard Vrolijk y Parlamentario Misha Raymond. Esaki debi cu nan no a aprecia e tono y acusacionnan cu e Parlamentario ta uza contra Vrolijk.
Partijraad di Partido MEP a reuni na unda cu Edgard Vrolijk a splica cu den Parlamento tin procedura y den e caso aki e comision encarga ta teniendo consultanan den comunidad pa loke ta trata e tema di matrimonio di mesun sexo. Usualmente ta esnan cu traha e ley mester tene e consultanan aki pero nan no a hacie.
E presidente di e comision encarga ta Darlaine Guedez-Erasmus cu a splica e trabaonan cu su comision ta haciendo, consultando cu stakeholders y instancianan den comunidad y cu pronto lo finalisa. Y asina cu e finalisa lo informa Presidente di Parlamento Edgard Vrolijk pa por yama e reunion.
Edgard Vrolijk a enfatisa cu esey ta e procedura y cu e no por kibra regla. E ta para pa integridad y e ora bo no ta kibra regla. Asina cu e trabaonan di comision ta cla lo yama e reunion mas pronto cu ta posibel, teniendo cuenta cu e agenda di Parlamento.
Partijraad di MEP a keda satisfecho cu e splicacion y a expresa sosten na Presidente di Parlamento Edgard Vrolijk den su posicion.
