Parlamentario Shailiny Tromp-Lee contento pa mira Parke Curason hayando merecido atencion

Durante reapertura di Cruyff Court Denzel Dumfries

ORANJESTAD (AAN): Diaranson atardi durante un cereomonia special, a tene reapertura di e cancha di futbol na Parke Curazon na Jaburibari.

   E Johan Cruyff Court ta forma parti di Parke Curason, un proyecto cu a keda realisa pa Minister Ramon Lee na aña 2006. Recientemente a cuminsa cu e renobacion di e cancha aki y ayera 11 di mei 2022 a realisa e reapertura di e cancha completamente renoba y na mes momento a dune e nomber Cruyff Court Denzel Dumfries.

   Denzel Dunfries ta un hungador di futbol profesional cu ta hunga actualmente pa Inter Milan y tambe ta forma parti di e team nacional di Hulanda. Denzel a nace na Hulanda pero su tata ta naci aki na Aruba. Den pasado el a yega di biba un tempo cortico aki na Aruba. Sigur hopi di nos hoben deportista por uza Denzel como un rolemodel. Masha pabien na Denzel y na su famia completo.

   Na e ocacion aki a hiba palabra representante di Johan Cruyff Foundation, Minister di Enseñansa y Deporte sr. Endy Croes y ex-Minister di Deporte sr. Ramon Lee. E ex mandatario a conta un tiki con ora el a tuma mando na November 2001, awe casi 21 aña pasa, e luga aki tabata un dump. Un desaster ambiental.

   Poco container di sushi cu ta basha over, djaca ta core rond. Bisiñanan no tabata nada contento cu e situacion. E tabata un molester, un mahos bista, malo pa salud y malo pa balor di e casnan den vencindario, malo pa e moral of sentido di orguyo di henter e bario y distrito.

   Un situacion cu e no por a laga asina y hunto a kibra cabes pa trece un alivio, un alternativa y un speranza pa e bario. For di esaki a nace un vision. For di loke nan a haya, nan a planta un simia y e vision a floria y duna su frutanan: Parke Curason un proyecto multifunctional. Un parke cu pistanan pa recrea, hunga y haci deporte y pa pone cherry riba e bolo, a logra haya e prome Johan Cruyff court di yerba artificial.

   Sigur Parke Curason ta un hoya di facilidad cu ta keda bon uza, diariamente y henter dia, pa grandi y chikito. Mescos cu hopi ayera presente mi ta hopi contento cu e cancha a keda renoba back. Un renobacion cu sigur tabata necesario y na su lugar. Na mes momento canando den e Parke nos mester realisa cu esaki merece mas atencion. Mi ta contento di mira e speeltuin tambe full nobo y ta spera cu demas parti di e parke tambe haya e atencion necesario. E proyecto aki sigur ta uno hopi bunita y di balor agrega pa e vecindario. Pabien na Minister Endy Croes. Pabien na Directiva di FFD y pabien na henter e bario. Un gradicimento di curason na tur envolvi y un y tur cu a haci e renobacion aki posibel e.o., Johan Cruyff Foundation, IBISA, FFD, FFCA y AVB.

   Mi kier a termina pa pidi tur esnan cu ta usa e parke, ban cuid’e, ta di nos e ta! Facilidadnan asina ta uni nos, ta brinda nos oportunidadnan social, deportivo y di recreaccion. Na mes momento e ta brinda nos e oportunidad di biba un bida mas saludabel y activo. Mi ta convenci cu poco poco pero sigur Gabinete Wever-Croes II y Minister Endy Croes lo percura na duna e atencion necesario y urgente na e infrastructura Deportivo di nos pais.