AZV hunto cu e dunadonan di cuido lo yega na un bon solucion

The content originally appeared on: Diario

Contribucion propio no ta un sorpresa

ORANJESTAD (AAN): Diferente dunador di cuido a mustra nan preocupacion tocante e introduccion di un posibel contribucion propio. Aunke cu e idea pa un contribucion propio no ta nobo pa Aruba y e principio ta conta riba sosten di specialistanan riba e tereno aki, toch tin algun resistencia bou di e personanan cu lo tin cu traha cu’ne.

   AZV ta compronde cu cualkier cambio ta dificil, pero e reto pa baha e gastonan cu 60 miyon pa aña ta uno grandi. Y un contribucion propio lo ta un parti esencial pa yega na e meta ey.

   Contribucion no ta algo di e ultimo temporada:

   No ta asina cu na comienso di e pandemia na 2019 AZV a comunica e opcion di un contribucion propio pa prome biaha. Ya caba den reportenan di 2009 (“Een gezonde AZV, de verantwoordelijkheid van ons allen”), 2011 (“De prijs van grijs”), 2014 (“Advies bevordering kostenbewustzijn en doelmatige zorg”) y 2017 (“AZV: bevordering kostenbewustzijn en doelmatige zorg”) e concepto ta wordo menciona.

AZV ta habri pa eventual alternativa, pero banda di un asina yama ‘sugar tax’ e dundonan di cuido no a menciona otro posibel opcionnan. E input di e comision di cuido a wordo considera y a tene cuenta cu e discusionnan cu e dunadonan di cuido ora di traha e plan “Ban reforma pa garantisa”.

   Vangnet:

   Claramente tin preocupacionnan cu AZV ta comparti cu e dunadonan di cuido. Manera e consecuencia pa personanan di menos recurso cu no lo por paga un contribucion propio. Esaki tin e atencion di AZV y di Gobierno pa yega na un solucion pa e grupo aki. Un tipo di vangnet lo zorg pa e efectonan negativo di e salud di e grupo aki ta minimal.

   Remedi:

   E cambionan den e pakete di remedi ta toca principalmente e tipo di remedi cu por wordo cumpra na botica sin receta. Pa tur tipo di indicacionnan medico lo keda remedi ainda via AZV. Nos ta spera un bahada di 30% den e cantidad di receta.

   Parlamento:

   E introduccion di un contribucion propio ta bay via un Landsbesluit houdende algemene maatregelen. Dus Parlamento di Aruba ta envolvi. Den e Ley di AZV for di comienso (1992) tabatin espacio pa un eigen bijdrage (contribucion propio). Tambe ta poni explicitamente cu e contribucion propio mester wordo paga ora di ricibi e cuido of servicio.

   AZV ta consciente di posibel problema di implementacion. Esey ta exactamente loke esnan cu ta ofrece cuido na Aruba, a subraya recien.  Pasobra kende lo bay cover gasto di e administracion extra cu cada Docter, Dentista, Laboratorio, etc., lo bay carga ora cu tin di busca un Cashier, Security Video Cameras, y mas aspecto di seguridad, ora cu oficinanan ta cuminza handle cu placa.

   Segun AZV, pesey nan semper ta dispuesto pa pensa hunto cu e dunadonan di cuido pa yega na solucionnan practico. Esakinan lo wordo discuti pronto cu e grupo.