The content originally appeared on:
Diario
ORANJESTAD (AAN): E anuncio aki cu a wordo haci door di Papa Francisco encuanto canonizacion di Dr. José Gregorio Hernández,
a wordo divulga Diahuebs atardi laat door di Santuario Nuestra Señora di La Candelaria na Caracas, ora nan a publica un video graba pa e media ‘Rome Reports’, unda a indica cu “cada dia ta yegando mas cerca e momento bunita aki pa Iglesia Catolico na Venezuela. Amen cu asina sea”.
Website di Canciyeria di Venezuela a informa tambe, cu durante un audiencia priva cu a ser haci na Palacio Apostolico di Vaticano, e embahador di Venezuela na e sede santo, Franklin Zeltzer Malpica, a presenta su cartanan credencial na Papa Francisco.
Den e reunion, e embahador a combersa riba diferente tema cu Papa, “principalmente riba e medidanan unilateral imponi door di Merca contra Venezuela”.
Ademas, Zeltzer a combersa cu Papa riba e canonizacion di Dr. José Gregorio Hernández y a bolbe ripiti e invitacion di president Nicolas Maduro pa Papa bishita Venezuela.
E diplomatico a propone na Papa pa e declara 2025 como “Aña Mundial di Paz” door di sede santo, cu lo bay coincidi cu e aña di Hubileo 2025. “E proposicion ta consisti cu Hefenan di Estado na mundo ta compromete pa stop gueranan, y e sernan humano tin di compromete tambe pa ta menos violento y mas amabel cu su prohimo y cu e ambiente”.
Papa Francisco a confirma cu e tin hopi deseo di bishita Venezuela, cu ta un pais pa cual semper e ta haci oracion, y alavez el a confirma cu e beato José Gregorio Hernández lo wordo canoniza.
Despues di esey, e embahador a reuni cu e Secretario di Estado di Sede Santo, cardenal Pietro Parolin, kende a puntra pa e siguiente eleccionnan presidencial na Venezuela, y a puntra pa e candidatonan. Ademas di esey, Parolin tabata kier a sa di e disputa entre Venezuela y Guyana pa e teritorio di Esequibo.
