Pakico Mike a exigi pa Benny ta Miembro di Parlamento?

​

Caso Avestruz ta produci un pregunta sumamente importante

*Durante campaña 2021 Benny tabata centro di campaña di AVP

*Den Corte di Husticia atrobe e fayo pa detecta Avestruz presenta 

ORANJESTAD (AAN) — E proceso democratico di Aruba como pais, ta exigi pa keda na Hueznan pa huzga si Benny Sevinger tabata culpabel of inocente den e Caso Avestruz.

E caso, sinembargo, ta mishi cu algo mas cu solamente e Codigo Penal di Aruba y Corte di Husticia.

E caso Avestruz ta drenta historia pa motibo cu Benny Sevinger tabata un Ministro, un persona cu mester a dirigi e pais a base di capacidad, cu e partido cu a pone su persona na mando, mester a garantisa pa asina asegura e norma di bon gobernacion, cu democracia ta exigi.

E caso di Benny Sevinger, sinembargo, ta hiba Aruba na mucho mas cu simplemente e hecho cu partido AVP a dicidi cu Benny Sevinger ta representa e partido den e gobierno cu AVP mester a forma a base di e respaldo cu AVP a haya pa medio di voto, cu ta expresion di deseo di Pueblo.

Con importante Benny Sevinger ta sigur pa e lider di partido AVP, a bini dilanti durante eleccion 2021, cu a cubri Aruba cu berguensa.

Pa prome bez den historia di e pais, un candidato di un partido tabata den prison pero a bira e nucleo di e campaña electoral di AVP.

Mike Eman a exigi cu Benny Sevinger mester ta riba lista di su partido aunke ya acusa y a haci cu pa prome bez den historia, Aruba a vota pa un persona den prison, cu imediatamente despues a presta huramento cu e lo sirbi interes di Aruba como Miembro di Parlamento.

Kico e motibo tabata?

Esaki ta keda e pregunta grandi pasobra segun regla democratico, un persona cu wordo eligi como Miembro di Parlamento mester controla si Gobierno ta hiba un bon maneho loke ta exigi conocemento.

Durante tratamento di e caso den tanto Corte den Prome Instancia como den Corte di Apelacion, e preguntanan cu Huez a haci na Benny Sevinger tabata directamente relaciona cu e hecho cu e no a realisa cu algo cu no tabata bon tabata pasa den e Ministerio cu tabata su responsabilidad.

Benny Sevinger den Corte a mustra cu e no a ripara nada malo cu tabata pasa y cu e el a laga na otronan, cu e mester a maneha y percura cu ta traha na beneficio di Aruba, pa atende cu tur loke ta relaciona cu Avestruz.

Segun declaracionnan di Benny Sevinger e no a ripara kico tabata pasa den e cartera pa cual e tabata responsabel den Gobierno pero cu e no a ripara cu su propio amigonan tabata haya beneficio cu e gran mayoria di Arubiano, no a conoce.

Ta na Hueznan pa yega na un veredicto pero democracia ta permiti nos puntra nos mes, ta con un persona cu no a ripara cu actonan criminal tabata desaroya den e circulo di su Ministerio y su amigonan directo, por carga e responsabilidad pa ta Miembro di Parlamento y Gobernante.

Democracia no ta puntra cual school un hende a termina pero ta exigi un contesta pa e pregunta pa un persona por distingui entre bon y malo y cu un persona por asina percura pa e bienestar di e pais, cu ta na su encargo.

Benny Sevinger no a mira loke a wordo condena den Corte di Prome Instancia y awor ta presenta na Corte di Apelacion como caso criminal den su Ministro, cu su personal, cu su circulo di amigo.

E pregunta ta keda pues, si e tin capacidad pa yama su mes controlador di bienestar di Pueblo  pakico un hende cu no por a mira kico ta pasa bou su nanishi segun acusacionnan, mester ta den Parlamento segun Mike Eman y AVP.

Un situacion sumemente curioso a presenta su mes hunto cu e pregunta grandi, pakico Mike Eman mester a centralisa un bataya politico pa eleccion rond di Benny Sevinger, cu a cubri Aruba cu berguensa, a wordo sentencia pa awor den Corte di Apelacion atrobe a laga tur hende sorprendi cu su incapacidad aparente pa realisa cu crimen ta wordo comete den su Ministerio y segun e acusacionnan asistencia di su circulo di amigonan.