The content originally appeared on:
Diario
Minister Endy Croes:
ORANJESTAD (AAN): Diaranson ultimo, durante Conferencia di Prensa di Gobierno di Aruba, Minister di Enseñansa y Deporte Sr. Endy Croes hunto cu Minister di Enseñansa, Cultura y Ciencia Sr. Robbert Dijkgraaf a informa Pueblo di Aruba tur locual ta haciendo hunto riba tereno di enseñansa.
E expertonan di Sint Maarten, Hulanda, Corsou, Boneiro y Aruba a reuni na Aruba dia 9 y 10 di april 2024 pa e proyecto Mision di Conocemento (Kenniscomisie). E meta di “Kennismissie” ta pa traha hunto riba cierto aspecto riba nivel di MBO y enseñansa superior di e paisnan di Reino Hulandes.
E temanan cu ta trata durante e reunion aki ta relevante pa tur pais entre otro, conecta e necesidadnan di mercado laboral (PEL) y intercambio di studiante (SEA). E echo cu e sistema educativo y diploma di e paisnan di Reino Hulandes ta similar, ta facilita nan trabou den ekipo. Ta trahando pa crea un panaroma educativo pa enseñansa superior cu por beneficia e hobennan studiante di Reino Hulandes.
Durante e conferencia di trabou cu lo tuma luga na Corsou dia 11 y 12 di april, lo reuni cu e studiantenan di e islanan Caribense y di Hulanda pa intercambia informacion di nan experencia. Ta importante pa determina kico ta funciona y kico no y evalua unda mester busca otro solucionnan. Minister Endy Croes a gradici Minister Dijkgraaf pa su gran trabou den ekipo y a indica cu a realisa resultadonan grandi den poco tempo danki na e compromiso di Minister Dijkgraaf.
Ademas di esaki, Minister Endy Croes a menciona algun proyecto cu a realisa caba riba nivel di Vierlandenoverleg entre otro, BSN nummer:
Awo e studiantenan por haci un peticion pa BSN nummer desde nan pais, pa asina facilita e proceso di registracion momento nan yega Hulanda;
“Mobiliteitsfonds”, unda a inverti alrededor di 1.2 miyon di euro pa e periodo 2024-2006;
“Stimuleringsfonds”, unda a inverti 1 miyon di euro pa e periodo 2024-2028.
Ademas di esaki, ta trahando riba e recomendacionnan di Doorlichting van het Arubaanse Onderwijsbestel entre otro, registracion di data, maneho di idioma, structura di cuido, infrastructura di edificio y modernisacion di e leynan di enseñansa.
Pues ta trahando duro riba tereno di enseñansa. Minister Dijkgraaf a felicita Minister Endy Croes pa e gran trabou cu e ta haciendo pa e desaroyo di enseñansa en general. E mandatario Hulandes a indica cu Minister Endy Croes ta un gran defensor y pionero di enseñansa.
Fuera di esaki, Minister Dijkgraaf a indica cu e “kennismissie” aki por hiba e colaboracion di e paisnan di Reino Hulandes riba un siguiente nivel.
Finalmente, Minister Dijkgraaf a expresa cu nan ta orguyoso di tur loke e paisnan di Reino Hulandes a logra trahando hunto y a gradici Minister Endy Croes pa e gran trabou den ekipo riba e tereno di enseñansa.
