The content originally appeared on:
Diario
ORANJESTAD (AAN): Durante 2024 aki, tabatin dos ocasion caba cu blaas traha di material ‘Mylar’ yena cu gas helium
a los y zweef den halto y bay pega riba wayanan di voltahe halto, ocasionando blackout.
Riba Diaranson atardi laat esaki a bolbe socede banda di 5:44 pm. E informe a drenta prome cu coriente a bay den diferente area di Sabana Blanco, Primavera, Paradera, Babijn, Sero Cristal, Rooi Afo, y vecindario.
Personal di NV Elmar mesora a mobilisa pa asina check unda e storing a socede, pa asina por start cu e proceso di isolacion, y despues cuminda pone coriente back.
E tecniconan no por a kere nan wowo, ora cu nan a yega na un palo di luz cu conexion di trafo riba dje, y na e kabelnan di voltahe halto na halto a bin haya resto di un blaas Mylar basta kima y ta djis un resto a keda.
Pues un biaha mas un blaas yena cu Helium a bay pega den waya di coriente y causa inconveniencia pa centenares di cas na Aruba. Asina a isola e problema y a cuminsa duna e otro areanan coriente back.
Despues di a revisa cu ningun componente mas di coriente a worde afecta, finalmente pa 6:30 pm ya ta tur hende a haya coriente back.
NV Elmar kier consientisa pueblo cu e blaas di Mylar yena cu helium ta traha di un material di aluminium. Aluminium ta un metal conductivo, na momento cu blaas aki yega den contacto cu e wayanan di coriente, esaki ta ocasiona un corto circuito. Laga nos tur sea mas conciente ora di uza blaasnan di helium y purba pa no laga nan bula bay. Esaki ta di 3er biaha cu blaas di Mylar cu helium aden ta causa blackout den cierto area. E compania ta gradici tur tecniconan cu a actua inmediatamente pa resolve e storing di Diaranson atardi.
