The content originally appeared on:
Diario
Minister Geoffrey Wever
ORANJESTAD (AAN): Minister Geoffrey Wever a anuncia un ‘Open Call’ na artistanan local pa produci un instalacion artistico na Plaza Comercio na Oranjestad. Ta encurasha artistanan local pa manda nan “proposal” pa un concepto creativo pa un instalacion artistico y asina sostene revitalisacion di nos centro di ciudad.
Pa detayes exacto, mas informacion y tambe por entrega un proposicion, acudi na e website: https://experienceoranjestad.com/artist_submission/
E iniciativa aki ta pa sostene e desaroyo di e industria creativo di Aruba, y haci Oranjestad un ciudad mas atractivo pa local y turista. Tur e esfuersonan aki ta pa no solamente subi e viabilidad comercial di e area pero tambe probecha na duna sosten real na crecemento di nos industria creativo local.
Nos industria creativo tin potencial enorme y lo contribui na diversification di nos economia. Autenticidad ta un factor esencial den e industria di servicio ultimamente, y bishitantenan local y internacional ta constantemente en busca di esaki. Ta nos artistanan ta esnan cu tin bista ariba loke ta haci nos como pais, y como sociedad unico. P’esey, iniciativanan manera esaki no ta djis un piesa artistico pero e ta un accion cu impacto real, segun minister Wever.
E obra di arte aki mester por sirbi como un luga pa saca potret cual por ser comparti mundialmente via diferente red social. E lo ta celebrando e spirito di iniciativa, resiliencia, innovacion, y creatividad cu ta defini e ciudad.
“Nos ta spera di por ricibi propuestanan inspirante di nos artistanan local cu por enrikece e panorama di e area”, minister Wever a termina bisando.
