Na Aruba tin entre 15 y 16 gang cu ta causa criminalidad y tiramento

Hopi mucha ta keda sin bay scol y forma parti di esakinan

ORANJESTAD (AAN): E situacion di criminalidad hubenil ta hopi preocupante. A sali na cla cu muchanan ta keda sin bay scol y ta forma parti di gangnan na Aruba. Hopi di nan ta dedica den asuntonan di droga, maltrato y tiramento.

   Recien Aruba a wordo sacudi cu dos caso di asesinato di hoben tras di otro. Ministerio Publico den su raport ta mustra e preocupacion grandi cu tin pa cu criminalidad hubenil.

   Criminalidad concentrando den 8 bario: Riba orden di Procurador General mr. Flanegin di Ministerio Publico, e experto riba criminalidad, dr. Henk Ferweda di Bureau Beke, a haci un investigacion profundo na Aruba y a traha un raport riba e criminalidad den hubentud.

   Investigacion haci ta mustra cu, criminalidad na Aruba ta concentra den e siguiente barionan: Pos Chiquito, Sabana Basora, Cayenastraat, Village, De Vuyst, Madiki, Dakota y Sero Patrishi. Mas cu mitar di e casonan ta relaciona cu maltrato, menaza y violencia publico. Loke ta preocupante ta e posesion di arma di candela cu ta sigui crece. Armanan ta bin for di Venezuela y Colombia.

   Cantidad di hende muhe envolvi: E raport ta mustra cu e cantidad di hende muhe envolvi den criminalidad a aumenta. Na 2024 el a subi na 25 %.

   Na mes momento ta constata cu hopi hende muhe ta bira victima di maltrato.

   Tin 15 pa 16 gang activo den barionan: E investigacion ta mustra cu e situacion economico na Aruba ta depende di turismo. E gastonan halto pa por tin un bida normal y e entrada abao riba mercado ta haci cu hopi famia ta consisti di e mama so, kende ta haci diferente trabao pa por mantene e famia. Esey ta trece cun’e cu no tin suficiente supervision riba e muchanan cu e consecuencia cu muchanan ta keda sin bay scol y ta bay forma parti di gangnan. E muchanan ta forma parti di gang pa busca identidad, respet y union pafor di scol y famia.

   Tin 15 pa 16 gang den barionan na Aruba y muchanan ta sinti nan mes cu poder y status, formando parti di gang. E gangnan ta envolvi den droga, menaza, maltrato, uzo di arma di candela.

   Esaki ta un desaroyo sumamente preocupante y Procurador General di Ministerio Publico a informa Minister di Husticia di e situacion y e problemanan cu ta confrontando pa por atende debidamente cu e problema serio aki.