The content originally appeared on:
Diario
Dos ladron den auto horta coriendo rond hortando luznan solar
ORANJESTAD (AAN): Dialuna a habri cu dolor di cabez pa autoridad, pasobra un trend inespera a presenta cu casonan di ladronicia di auto riba e fecha 20 di Mei 2024.
Uno di e autonan cu a wordo horta ta un Toyota Tercel color berde scur cu number A-61988 cu a wordo horta for di un cas na Sabana Basora. Esey a socede den oranan di marduga.
E doño mainta trempan a haci denuncia di ladronicia na Polis. El a duna descripcion amplio, esta cu e auto ta tinted windows, cu tin reem di color briyante/oro asina, y cu tin number riba bentana pa ora di Streetlegal Race na Palo Marga.
Esnan cu a horta e auto aki, a tuma rumbo pa area di Noord. Un di e hendenan aki den e auto, parce cu e ta adicto no djis na droga, sino adicto pa horta luznan cu a bin na moda awor, esta esnan cu ta bin cu nan propio solar panel inclui den dje, of esnan cu tin e solar panel poni apart.
Coriendo den area di Noord, e homber aki a cuminsa baha na varios cas, y cu djis un rek di man tabata horta e luznan solar aki. Na un cas na Boegoeroei tambe el a haci esaki, y imaginabo 7’or di mainta ora cu ya caba tin claridad di solo, den menos di 5 seconde ta baha, ranca e luz y bay cune den e Toyota Tercel. Sinembargo un high-resolution security videocamera a capta e accion aki.
Doño di e Luz Solar a haci denuncia na Polis, y a bisa cu e ladronnan ta coriendo den un Toyota Tercel berde scur, tinted windows, cu reem special na e wielnan.
Mientras tanto e doño original di e auto tambe a haya yudansa di amigonan, pa el a keda core rond tur riba e isla, pa asina check e ‘hot-spots’ caminda ta conoci cu ladronnan ta bay cu autonan horta.
Diripiente ora el a pasa dilanti e adres di Sero Janchi 14-A, el a bin nota cu su auto tey. El a core yama Polis, kendenan a yega mesora y hunto cu mas unidad di Polis a tene un accion na e cas.
Aki nan a bin haya e Toyota Tercel berde, a haya e dos ladronnan cu tabata core den e auto. E dosnan aki a keda deteni. Tabatin un hoben mas eynan, kende a ser deteni como cu el a duna nomber falso na Polis. Esey ta algo castigabel, y pesey el a ser aresta.
Den e cas aki, cu ta manera un ‘Chollerhouse’ a bin haya un stock gigantesco di Luznan Solar. Ta parce cu e ladron aki gusta horta Luz Solar. Kizas por cuminsa yama e hombernan aki pa ‘Buchi Solar’.
A haya luznan Solar cu ta costa como 50 Florin, pero tambe a haya monton di luznan caro cu ta core den 200 pa 350 Florin. Tur esakinan a wordo confisca, hunto cu e solar panels. Ken por a kere cu den un Chollerhouse ta bin haya asina hopi solar panels.
A haya mas mercancia cu ta claramente procedente di ladronicia, y tur a wordo confisca. Ciudadanonan di Noord, Sabana Liber, Boegoeroei, Montaña, Sero Janchi, Moko, y Paraguana cu ultimo tempo a perde luznan solar instala pafo, awor bo sa unda nan a bay finalisa.
Riba e potret por mira e ladron bahando for di auto, y rancando e luz solar pa bay cune. Algun ora despues, el a wordo aresta y ta cera den cel.
