Ministro Glenbert Croes satisfecho cu awor tin mas oportunidad via Enseñansa pa Empleo

ORANJESTAD (AAN): E siman aki, Minister Glenbert Croes a bishita e edificio di Enseñansa pa Empleo (EPE) pa mira e avance di e trabaonan pa cu e facilidadnan nobo.

Un EPE nobo na unda lo prepara tur esnan cu ta den necesidad di trabao of cu a perde trabao durante e pandemia pa por drenta back e mercado laboral.

   Manera ta conoci EPE a worde funda na aña 1988 pa yuda tur esnan cu a perde trabao tempo cu Lago a cera su portanan na aña 1985. Mirando e necesidad den comunidad pa trabao e tempo ey, gobierno a bin cu e proyecto pa ‘her- en bijscholing’ di e hendenan cu no tabatin trabao. Asina EPE a worde funda pa ofrece esnan cu mester a prepara pa un otro trabao, cursonan pa un ofishi nobo, entre otro den custruccion y den e industria hotelero. Actualmente Enseñansa pa Empleo ta ofrece un variedad di curso riba diferente nivel pa crea oportunidad pa nos comunidad den e mercado laboral.

   E pandemia a causa un calamidad economico, poniendo Aruba den un situacion hopi mas dificil cu tempo Lago a cera. Pesey ta importante pa un biaha mas gobierno duna asistencia creando oportunidad na esnan den necesidad pa por siña haci otro tipo di trabao. E cooperacion di sector priva tambe ta di gran ayudo. Den e caso aki, Aruba Marriott Resort and Stellaris Casino a tuma e oportunidad pa apoya e cursonan y train esnan interesa pa fungi como dealer den casino. E interes pa cu e curso aki ta halto mirando cu hasta esnan cu ta traha como security ta interesa den bira un dealer den casino y gana un mihor salario.

   Esaki sigur tambe ta di gran beneficio mirando tur e proyectonan hotelero cu tin andando. Minister Glenbert Croes ta sumamente satisfecho cu e trabaonan na EPE, y ta gradici Aruba Marriott Resort and Stellaris Casino pa e apoyo cu nan ta brindando gobierno y e comunidad di Aruba en general. “Den aproximadamente un luna lo anuncia e gran reapertura di e EPE nobo, pa henter nos comunidad, nos hendenan, nos yiunan di tera y tur nos trahadornan por probecha di su cursonan” Minister Glenbert Croes a expresa.