The content originally appeared on:
Diario
Omar Oduber di Plataforma Pais:
E no por a ni sigui e maneho laga cla atras p’e
ORANJESTAD (AAN): Ex-Ministro Otmar Oduber, kende awor ta pertenece na Plataforma Pais, a comenta recien riba maneho di desperdicio, a indica cu na aña 2018 a traha un rapport den cual tur actor tabata envolvi y cu a presenta conclusionnan na plaso corto, medio y largo di loke tin cu sosode.
E rapport aki a cuminsa worde ehecuta literalmente, a cera Parkietenbos e tempo ey pa loke ta sushi di cas como meta na plaso corto. Pa plaso medio mester a wak kico ta haci cu e sushi di cas y a yega na un acuerdo cu Ecogas pa baling, esta hinca e sushi den pakete controla bao tera. E tempo ey expertonan a bisa cu Ser’i Teishi por worde uza pa esaki pa un periodo di maximo 3 aña. Awe ta bayendo pa 5 aña y ta bayendo mas. “E desaster cu nos ta preparando nos mes pe na Ser’i Teishi nos no ta ni imagina kico e ta, pasobra bo ta forsando pa un desaster cu ta bay sosode aki 5 pa 10 aña unda cu lo mester bay coba y saca tur e sushi ey y atende cune”, Otmar a declara.
Pa plaso largo e meta tabata pa bin cu un incinerator pa Pais Aruba. For di momento cu e rapport a keda cla a traha riba tur tres plaso di biaha, logrando plaso corto y medio y pa e plaso largo a laga e ley di Serlimar, pero esaki, te dia di awe, ta pega den Parlamento. E tempo ey tabatin companianan di 19 pais rond mundo cu a participa na un destaho publico, pero te dia di awe nada no a bin.
Oduber ta puntra ta kico minister Ursell Arends a haci? Blokia tur cos?
Pa loke ta Serlimar a bin cu un surceance van betaling cu no mester a tuma lugar, pasobra e compania nunca tabata bancarota y mas bien gobierno di Aruba debe e compania 72 miyon Florin, pasobra gobierno y ministernan a hunga politica cu Serlimar. Tin un rapport di Grant Thornton cu ta bisa cu tur a hunga cu Serlimar.
Otmar a logra realisa dos di e metanan y laga e di tres cla pa realisa den un tempo di 2 aña, pero Ursell Arends den 3 aña no a haci nada, siendo cu tur cos a worde laga atras practicamente cla pe.
E destaho publico a worde para pasobra un compania local a bisa cu e sushi cu e ta recoge e ta bay exporte y manda Colombia. E tempo ey Otmar a bisa cu ningun sushi ta bay worde exporta, y awe casi 6 aña despues, ningun bari di sushi a worde exporta. Mientras tanto, 3 aña pasa Colombia a pasa un ley cu ta prohibi importacion di sushi, dus e fantasia di exporta sushi no a tuma lugar y no lo bay tuma lugar tampoco.
Ursell Arends ta papia di a cera dump, pero no tin ningun sanitaire landfill, e ora e pregunta ta bin unda ta hincando e baterianan, azeta, kimiconan y productonan dañino y peligroso di Aruba? Ta derandonan? Oduber ta pidi e 21 miembronan di Parlamento ap puntra minister Ursell Arends unda esakinan ta bay si dump ta cera?
