Minister Rocco Tjon a splica tocante e proceso encamina prome e Ley di Crèche a drenta na vigor

​

Un ley hopi importante pa garantiza seguridad di e mucha:

ORANJESTAD (AAN) – Den entrevista cu DIARIO, Minister di Husticia y Asunto Social, Rocco Tjon, a elabora tocante e Ley di Kinderopvang (crèche)y e proceso cu a wordo encamina prome cu el a drenta na vigor.

E ley aki a haya aprobacion den Parlamento despues di mas cu 20 aña cu a wordo poni un banda door di diferente constelacion di Parlamento.

E dignatario a subraya cu tabata hopi necesario pa e cuido di mucha wordo reglamenta, y sigur e ley aki tabata hopi importante pa su persona garantiza e seguridad di tur mucha cu ta atende un crèche, un “kinderopvang”.

“Pues, esey ta e parti di mas importante, pero obviamente e ley aki ta regla mucho mas. E ta regla e parti di seguridad, higiene, e desaroyo profesional di cada persona cu ta traha den un crèche, pero tambe e cantidad di leidster cu mester tin, pa cierto cantidad di mucha”, Minister Tjon a indica. El a agrega cu, obviamente, esaki ta importante pa e parti di seguridad tambe.

Esaki ta e proceso cu a wordo encamina unda tur e crèchenan a forma parti di dje. Tabata tin hopi momento di contacto y anochinan di informacion cu a wordo organiza pa Departamento di Mucha y Hoben.

“Y loke a trece dilanti di gobierno ta cu nos lo guia nan pa yega na standardnan cu ta necesario pa cumpli cu e ley. Kiermen, e ta bay ta algo cu den fase. Kiermen, nos no ta bay yega duna boet ni ta bay kita permiso. Al contrario, nos kier yega caminda nos ta bay otorga permisonan manera mester ta”, Minister Tjon a declara.

E mandatario a splica cu e centronan di cuido di mucha ta bay haya un plan, con nan por yega na cumpli cu diferente aspecto, y obviamente, e departamento di mucha y hoben lo guia nan den e proceso aki.

“Kizas algun scol ta mas leu cu otro, dus algun scol kizas tin mas rekisito c cu no ta cumpliendo cu ne aworaki, cu nan mes ta bay traha riba dje, por ta e parti infrastructural, pasobra ta conoci cu varios di e crèchenan aki no a wordo diseña pa ta un crèche. E ta un cas (na modo di bisa), y el a cuminza wordo explota como un crèche. Kiermen e no ta cumpli cu diferente aspecto y obviamente e parti di infrastructura tambe ta hopi importante, pa por garantiza seguridad di e muchanan”, e dignatario a indica.

Pa djis duna un ehemplo, el a bisa cu tabata tin algun caso unda wayanan di coriente ta colga y plas di awa riba vloer, y obviamente esaki no ta un situacion safe pa e muchanan. Esaki ta aspectonan cu a tene cuenta cu ne, e mandatario a señala. El a subraya cu, en todo caso, e controlnan a cuminza y lo continua, y ta haci esaki hunto cu polis di bario di Cuerpo Policial.