Minister Presidente a realiza apertura di RWZI di Parkietenbos

ORANJESTAD (AAN)—Den nomber di Gobierno di Aruba, y specialmente den nomber di Minister Rocco Tjon cu actualmente tin e cartera di energia,

Prome Minister Evelyn Wever-Croes, durante un conferencia di prensa na RWZI di Parkietenbos, a anuncia y realiza e apertura di e facilidad aki.

            E mandatario a recorda cu e facilidad aki a wordo cera na Maart ultimo, pa motibo cu no por a procesa e desperdicio cu tabata bin aki, tambe debi na falta di mantenimento pa hopi aña.

            “Mi ta contento di ta akinan, pasobra esaki ta e prome resultado di e decision di privatiza e trabaonan di RWZI den e caso aki, na e compania estatal AWSS (Aruba Wasterwater Sustainable Solutions). Y aworaki, danki na e inversionnan haci door di AWSS, e planta ta trahando bek y awe ta habri e facilidadnan un biaha mas. Esaki ta trece un alivio hopi grandi pa esnan cu ta trece e awanan di Parkietenbos mas tanto, y cu mester a bay te zeewijk, y a pidi nos for di hopi tempo caba si por habri e facilidadnan aki. Y mi ta hopi contento cu aworaki, nos t’asina leu”, Minister Presidente a indica.

            E dignatario a gradici AWSS y su trahadornan pa e trabaonan grandi cu a wordo haci y cu a tuma e encargo si, no solamente e facilidadnan cu tabata den mal estado, pero cu a mehora nan, y pa e pueblo di Aruba cu a sinti alivio.

            “Esaki ta e prome, y mi ta spera cu tin hopi mas den futuro. Pabien, y hopi, hopi danki”, Premier Wever-Croes a conclui.