The content originally appeared on:
Diario
ORANJESTAD (AAN) – Diamars atardi, Minister Glenbert Croes, titular di Labor, Integracion y Energia,
a duna informacion na prensa den cual a elabora tocante e investigacion cu ta tumando lugar door di posiblel corupcion na DIMAS y hende di su ministerio cu por ta implica den dje. E ta referi na e razzia teni Diamars mainta trempan na dos cas, dos negoshi, oficina di su Ministerio na edificio di Cocolishi, y tambe na edificio di DIMAS. Tur esaki ta den cuadro di investigacion ‘Caso Portulaca’, cu ta encera ‘permisonan di estadia’.
Minister Croes a señala cu su ministerio ta dunando tur cooperacion na e investigacionnan cu ta tumando lugar, pasobra si tin algo cu e dignatario y su staf ta luchando contra dje ta e tema di corupcion, den tramitacion di permiso, unda cu e por ta tumando lugar.
“Di mi banda, obviamente, boso tambe por a tuma nota cu e investigacion ta uno hopi profundo, hopi amplio, cu tambe lo kier confirma cu minister no ta implica den cualkier señalamento, ni cualkier asunto cu por ta dudoso”, e dignatario a señala, agregando cu ta p’esey mes su instruccion, tur departamento, su ministerio ta cu ta duna tur cooperacion p’asina asegura cu e berdad sali na cla.
“Asina nos por duna nos pueblo cuenta, riba e rectitud di e procedure den e gestion cu nos kier den e maneho cu nos ta hibando, riba terenonan di labor, energia y integracion. Ora cu bo ta goberna un pais, hopi biaha bo ta wordo desafia y esaki no ta prome biaha, manera boso sa. Anteriormente, ya caba a purba tambe implica minister inhusta y incorectamente, den asuntonan. Loke pa mi ta importante como minister ta cu mi kier pa hende sa unda nos ta para, mi kier pa tur hende sa cu mi ta sostene e investigacion amplio aki, pasobra nos mester eradica, elimina y caba cu e corupcion cu tin den loke ta permisologia, cu permisonan di hendenan cu ta wordo hinca den situacionnan dificil, p’asina nan por saca un permiso”, Minister Glenbert Croes a subraya.
El a sigui bisa cu e lo a desea cu e maneho cu ta wordo hiba na DIMAS y tur otro departamento unda bo ta haya bo permiso simplemente, pasobra bo a cumpli cu e rekisitonan y cu e maneho, y cu “no tin nada di haber cu duna placa pa aki, duna placa pa aya. Absolutamente cu no!” E dignatario a remarca.
“Nos ta kere tambe cu eror tin consecuencia, y p’esey mes ta un situacion lamentable, ora e investigacion aki tuma lugar, nomber ta wordo menciona; mi no por comenta riba dje, y mi ta spera cu un bez e investigacion aki, cu ta bay tuma su tempo, mi ta spera cu ta lo mas amplio posible”, Minister Glenbert Croes a señala.
E ta spera cu esun cu a comete e eror cumpli cu su consecuencia, lamentablemente, y cu na dado momento e minister por para dilanti pueblo y bisa: “esaki ta loke a tuma lugar y esaki ta e erornan cu a wordo cometi y esaki ta e consecuencianan cu tin”. Asina e dignatario a indica.
