The content originally appeared on:
Diario
E peso di un crimen comete ta wordo mihor pronuncia
*Mundialmente por nota cambio di nocion di loke ta crimen
*Desaroyonan moderno ta entrega mas sosten na criminalidad
ORANJESTAD(AAN)—Na momento cu mundialmente e tema di abuso sexual di mucha a wordo pone den centro di atencion, DIARIO a papia cu uno di e victimanan cu tabata tin e curashi di describi su experencia y tambe presenta e dosis di castigo cu e abuso contra ser humano merece.
Den e cuadro aki, atrobe el a presenta den publicidad su pensamento cu mester introduci un Castigo Minimo pa criminalidad.
Un proposicion cu sigur a haya atencion di DIARIO, cu manera a wordo priminti, lo sigui atende e pensamento aki cu expertonan riba tereno legal.
Mester bisa cu e proposicion sigur basa riba desaroyonan cu mundo conoce actualmente, a representa en berdad un posibilidad pa comunidad pa medio di castigo mas dirigi, duna peso na e tipo di criminalidad en cuestion.
Castigo minimo manera presenta na DIARIO, lo mester encera un castigo cu no ta mara na un maximo manera ta conoci actualmente, pero tin un minimo cu asina ta asegura cu e peso di e resultado di e crimen, ta haya reconocemento.
DIARIO a discuti e posibilidad presenta cu expertonan, cu tambe a para keto na e proposicion lanza, cu ta mishi en berdad cu e realidad cu ta papia di un maximo como punto final pero no ta presenta un minimo como base for di cual no por baha.
Pa Huez por pronuncia un sentencia, e base di e sentencia mester a cana un proceso segun ley, cu ta wordo atende dor di Parlamento di Aruba, cu ta e representacion di Pueblo encarga cu e base legal di e pais.
Ehecutor di e decision di Parlamento, ta bira Husticia, cu mester tene su mes na leynan tambe y asina mester tin participacion den e desaroyo aki.
A wordo indica cu Aruba como Estado di Derecho, no por introduci of cambia ley sin mas pero mester tene su mes na loke e cuadro di ley ta bisa riba e tereno aki tambe y duna siguransa cu e decision cu tuma ta cuadro cu e bienestar general di e pais.
Un castigo minimo ta haci, cu un alarma mas pisa ta zona pa e mundo di delincuentenan cu ta na haltura cu e castigo cu nan ta ricibi pa nan violacion di ley, lo ta minimal loke a keda presenta den Ley. Pues legalmente, tin un castigo basico for di cual no por desvia, loke ta haci cu e criminal tambe ta comprende cu e lo por ricibi por lo menos e castigo minimo, cu ley ta prescribi.
Expertonan a bay di acuerdo, cu e pensamento aki ta haci cu en berdad e posibel criminal, ta presta mas atencion na resultado di su acto, pasobra e ta directamente presenta cu loke “por lo menos”lo ta su castigo si e wordo declara culpabel y no ta biba cu e ilusion actual, cu aunke e castigo maximo por ta sumamente pisa, e no haya e castigo maximo.
E situacion mundial actual, ta contene cambionan serio, manera a wordo admiti tambe pa expertonan cu ta mustra cu no solamente tecnologia ta causa mas crimen pero e cambio moral cu a presenta su mes, ta causa basta confusion.
Na mes momento modelonan di comunidad mundial hopi bez no cualifica pa modelo, si sigui e buskeda di un moral mas eleva.
DIARIO a honra su deber di duna contenido na proposicion di un ciudadano, victima di criminalidad den un proceso mundial cu mas y mas ta busca formula pa frena criminalidad, cu manera ya bisa, desaroyonan ta duna mas aliento a base di un moral permisibel nobo, cu por aumenta e cantidad di victimanan sigur riba tereno di leynan cu ta atende cu moralidad.
