EPB Oranjestad y DIARIO ta aclara
*Director Lopez a indica cu esaki ta di 15 pa 17 di juli venidero
ORANJESTAD (AAN): Tin algun persona no a compronde bon e relato, y a pensa eroneamente cu EPB Hato lo bay habri un MAVO pronto.
Esnan cu a lesa e articulo ta compronde cu esey no ta loke a wordo treci dilanti. Simplemente a mustra cu alumnonan di MAVO cu tin intencion di stop cu nan scol, cambia y awor sigui nan estudio na EPB e aña escolar venidero, lo por haci esaki inmediatamente despues cu scol cera.
Den un entrevista cu director Erwin Lopez, el a splica cu durante dianan 15, 16 y 17 di Juli, EPB lo habri su porta pa registra alumnonan cu ta cambiando di MAVO pa EPB.
Muchanan di scol basico cu mester inscribi tambe ta bon bini pa pasa na EPB Oranjestad na Hato durante e dianan aki y den e orario regular di scol.
Inscripcion no por wordo haci online. Tur interesado mester presenta personalmente na EPB Oranjestad na Hato pa completa e proceso di registracion.
Director di EPB Oranjestad na Hato, señor Erwin Lopez, ta haci un yamada na alumnonan di MAVO pa no laga inscripcion pa ultimo momento y pa yega na tempo. El a splica cu e opleidingnan ta yena segun e cantidad di registracionnan cu ta drenta. Esaki kiermen cu alumnonan cu tarda mester scoge un otro direccion di estudio si e opcion preferi a yena caba.
Segun Lopez, ainda tin espacio disponibel den tur opleiding. Electro ta entre e direccionnan cu ta yena mas lihe, principalmente door di alumnonan di EPB mes. Tambe ainda tin lugar disponibel den direccionnan di Cuido, Servicio y Coki, cu actualmente ta entre e opcionnan mas popular.
Pa alumnonan cu tin interes den tecnologia, Lopez a indica cu EPB San Nicolas ta ofrece e programa ICT Support. E programa aki ta prepara studiantenan den area di computernan, rednan, cloud computing, mantenimiento, instalacion, solucion di problema y otro habilidadnan tecnico cu ta importante pa e mercado laboral actual.
EPB ta anima tur alumno interesa, pa registra na tempo, asina cu nan por aumenta nan oportunidad di haya un luga den e direccion di estudio cu nan realmente ta desea.
