The content originally appeared on:
Diario
ORANJESTAD (AAN): Diahuebs, mei 24, 2024, Kiwanis Club of Palm Beach a organiza un evento special, durante cual a instala dos (2) miembro nobo.
E evento aki a tuma lugar na La Cabana Beach Resort & Casino, cu a percura pa un cena masha dushi mes, cual e miembronan a disfruta hopi mes.
E anochi menciona, tabata e ceremonia oficial den cual e miebronan nobo: Giandric Tromp y Roël Gomez, a ricibi nan pin oficial for di President Onasito ‘Chito’ Thiel. E patrocinadornan pa FK Giandric ta FK Jurgen Benschop y FK Michael Bareño, y pa FK Roël ta FK Jurgen Benschop y President Chito Thiel.
E ceremonia, cu a wordo conduci pa President Chito a observa tur e aspectonan protocolar di Kiwanis International. Y manera costumber, e anochi a culmina manera semper cu e hermandad (”fellowship”), den cual e miembronan nobo hunto cu nan pareha a haña e oportunidad pa conoce nan compañeronan di club un tiki mas di cerca y den un contexto y esfera diferente, e informal.
Den nomber di President Chito, e comite organizador di e anochi en question,y henter e miembrecia di Kiwanis Club of Palm Beach, ta yama FK Giandric y FK Roël, un cordial y caluroso bon bini, y alabes ta desea nan hopi ora nan di servicio na comunidad y hermandad.
Kiwanis Palm Beach ta forma parti na e organizacion global “Kiwanis International” cu ta un instancia caritativo dedica na servicio na comunida cu e obhetivo principal pa haci nos mundo mihor door di cambia un comunidad pa medio di un mucha cada bez.
