The content originally appeared on:
Diario
Derechonan Humano Nacionnan Uni mester bandona Venezuela
Decision pa no habri frontera cu Venezuela a resulta clave ayera
ORANJESTAD (AAN) E caminda pa yega na eleccionnan na Venezuela, durante 2023 a wordo ilumina pa e promesanan di Nicolas Maduro, cu e lo respeta e base di eleccionnan limpi.
Cu e promesa di Nicolas Maduro tabata mas bien un señal pa e region prepara su mes bon pa loke ta bini, tabata e advertencia di DIARIO.
Con grandi e peligro pa stabilidad den e region a bira, a wordo confirma ayera cu e informacion cu Nicolas Maduro a dicidi di manda e representantenan di e organo di Nacionnan Uni pa Derechonan Humano, cas.
E representantenan di e organo a haya tres dia pa bandona Venezuela, cu a entrega e prueba pa cual tanto advertencia a wordo emiti, cu eleccion na Venezuela sigur lo no ta basa riba principionan democratico y cu por spera bastante problema prome cu Venezolanonan por expresa nan mes na urna electoral, si e dia aki yega.
Informantenan clave cu DIARIO a consulta ayera a mustra riba e propabilidad grandi cu e tension politico na Venezuela solamente lo aumenta y cu no mester carga ningun speransa cu lo tin un desaroyo positivo den direccion democratico.
Mas bien por a scucha advertencia pa paisnan den vecindario di Venezuela tuma mas medida riba tereno di seguridad nacional, den un situacion cu Nacionnan Uni mes no por ignora.
Ya na e frontera di Venezuela cu Guyana, tension ta sigui aumenta mientras Venezuela ta exigi un teritorio cu ta representa dos tercera parti di Guyana como teritorio di Venezuela.
Essequibo, cu reservanan enorme di oro y diamente, ta riba e top lista di produccion di petroleo na mundo y conoce un cantidad importante di inversionistanan Mericano.
E oficina di e organo di Nacionnan Uni pa Derechonan Humano a haci su entrada na Venezuela na September 2019. Segun Nicolas Maduro awor mester revisa e ocupacionnan di e organo na Venezuela.
Di e forma aki Nacionnan Uni ta wordo confronta directamente cu e realidad di e temor cu ta existi actualmente, pa loke ta trata derechonan humano na Venezuela na caminda pa eleccionnan, cu si nan ta realmente democratico, por pone un fin na mando di Nicolas Maduro.
Mester tene na consideracion cu Miyones di Venezolano cu lo a vota den e eleccion aki, ya a bandona Venezuela y cu den e situacion nobo cu a presenta den e ultimo dianan aki, mas y mas Venezolano lo trata di busca un porvenir mas sigur pa nan persona y pa nan famianan.
Den e cuadro di e realidadnan sumamente peligroso na Venezuela, informantenan a mustra cu uno di e decisionnan mas importante, si no ta e decisionnan mas importante cu Aruba por a tuma tabata, cu no ta habri frontera entre Aruba y Venezuela.
Informantenan ta splica DIARIO cu den e presion enorme cu tin pa normalisa trafico entre Venezuela y Aruba, sigur Aruba den e cercania di Venezuela, mester tene na consideracion, e peligronan enorme cu e pais por importa na momento cu habri e fronteranan sin e condicionnan cu Aruba a presenta pa su seguridad y di Arubianonan, pero cu Venezuela a nenga.
E desaroyonan nobo na Venezuela, segun expertonan riba e tereno di seguridad regional, solamente lo ta inicio di situacionnan mas serio cu por spera mientras e momento pa Venezuela bay urna electoral, segun fecha di ultimo eleccion, ta yega mas cerca.
Te awor no tin ningun seguridad cu eleccionnan lo tuma lugar segun informantenan, cu ta papia di e forma cu e situacion actual ta afecta habitantenan di e pais cu no solamente ta biba den condicionnan financiero y social desastroso, pero cu un grado di temor cu ta empeora tur dia.
Den seno di Nacionnan Uni ya e suceso a wordo rechasa y den e proximo dianan por spera reaccionnan di paisnan enfrente desaroyonan, cu ta indica claramente cu Venezuela a bira un problema y peliger enorme pa stabilidad den e region Caribense y Latino Americano.
Nacionnan Uni mester anuncia oficialmente na mundo kico lo pasa awor cu su organo cu ta segura Derechonan Humano, mester a bandona Venezuela cu argumentonan cu ya riba plataforma ta wordo considera como invalido!
