The content originally appeared on:
Diario
Den cuadro di 200 aña di Oranjestad
ORANJESTAD (AAN): Despues di varios luna di preparacion, dialuna mainta Impact Hub Aruba, Minister di Asuntonan Economico, Comunicacion y Desaroyo Sostenibel, Sr. Geoffrey Wever, Universidad di Aruba y Camara di Comercio, cu sosten di WEB Aruba y SETAR NV, a anuncia un tremendo proyecto cu ta bay inicia den cuadro di e celebracion di 200 aña di Oranjestad.
E proyecto innovativo aki yama: O’STAD200 Incubator cu ta un programa di incubacion pa ‘start-ups’ y companianan estableci caba. Den contexto di desaroyo di comercio ta conmemorando e 200 añanan di Oranjestad di y ta traha cu socionan strategico pa establece un fundeshi hopi mas resiliente y fuerte pa e entrepreneurs di Aruba.
Mary-Ann Falconi-Rasmijn, Co-Fundador y General Manager di Impact Hub Aruba a duna di conoce cu pa 2 aña caba nan ta trahando hopi di cerca cu entrepreneurs local y esunnan cu ta bishita Aruba. “Nos sa kico ta nan necesidadnan y loke nan mester pa ta exitoso den nan trayectoria di entrepreneurship”.
Impact Hub Aruba ta parti di un organisacion global cu ta inculca sostenibilidad como fundeshi den cada un di nan miembronan y partnernan pa asina empodera e ‘entrepreneurship landscape’ y hacie mas resiliente.
E iniciativa como tal ta un programa di incubacion unda cu ta duna oportunidad na ‘start-ups’ y companianan estableci pa forma parti di e programa aki cu e obhetivo di acelera nan conocimento, duna nan recursonan y e hermentnan necesario den un periodo intensivo cu guia di facilitadonan cu ta expertonan den e industria mes, como tambe profesionalnan den e area academico, cu lo fungi como mentor. Nan lo sigura e exito den nan emprendimento, Falconi-Rasmijn a splica.
E proyecto aki ta duna oportunidad na tur industria cu ta relevante pa mercado di Aruba participa den un trayectoria intensivo di 3 luna unda cu cada participante lo haya training, tayer, networking, oportunidadnan y lo crea un comunidad empresarial.
CATEGORIANAN:
Ta bay tin dos categoria disponibel: ‘start-ups’ cu tin ideanan y kier concretisa esaki na un compania, por ta personanan cu tin un compania caba te cu 2 aña di existencia.
Tambe tin e categoria di ‘scale-ups’ cu ta personanan cu ya caba tin un compania estableci, ta activo riba mercado cu mas di 2 aña di existencia.
Esnan den e categorianan aki lo por participa den O’STAD200 Incubator caminda nan lo presenta un ‘pitch’ den un competencia. E ganado final di e competencia lo gana 10 mil florin, suma cu lo por wordo inverti den concretisa plannan y pa ta mas exitoso den nan trayectoria.
Despues di e ‘pitch’ lo tin un trayectoria adicional di 6 luna unda cu cada participante lo continua den e programa di ‘incubator’ pa sigura cu nan metanan lo wordo cumpli y asina Aruba por conta cu mas entrepreneurs bon prepara, empodera y resiliente, Mary-Ann Falconi-Rasmijn a expresa.
DIARIO lo trece mas informacion den otro articulo, pero esnan interesa den e proyecto aki por bishita www.ostad200.com pa mas informacion. Inscripcion ta habri caba.
