The content originally appeared on:
Diario
Pader Jose Nava:
ORANJESTAD (AAN) – Pader Jose Nava a yama un conferencia di prensa, na un siman despues cu Luna di Mei a cuminza, y cuminza pa bisa cu esaki ta un tempo hopi special, pasobra como Misa Catolico ta bay celebra Fiesta di Pentecost, cual tin un nificacion profundo, pasobra e ta e momento cu a caba di funda e Iglesia Catolico.
“P’esey, awe Iglesia Catolico na Aruba kier yama nos pueblo pa cuminza celebra un Siman Catolico. Un siman unda nos por descubri pakico nos mester sinti orguyo di ta Catolico.
E religion Catolico a trece y ta sigui trece hopi Gracia, no solamente na nivel spiritual sino tambe na un nivel humano. Esey ta un di e detayenan importante den nos FE catolico.
P’esey durante e siman aki, nos kier busca obhetivonan. Y nos obhetivonan ta: specificamente nos kier conoce y profundiza nos FE, pero tambe mustra cu orguyo nos FE”, Pader Jose Nava a señala.
El a sigui splica cu den e cuadro aki, den cada parokia tin diferente actividad den e contexto di nobenanan, na honor di Spirito Santo. Por ehemplo, Pastor Jairo di Misa di Santa Cruz, den e nobena cada dia tin scol invita, pa participa durante e nobena pa e muchanan, mayornan, hunto cu e comunidad por cana den e nobena na Spirito Santo, pero na mesun momento conoce y profundiza den e Identidad Catolico, nos FE Cristian.
“Tambe nos mester mustra nos FE. Nos Fe no por keda den nos, nos mester comparti cu otro. Cu esey, nos tin un elemento chikito cu cual nos kier mustra nos FE meymey di nos pueblo, meymey di nos comunidad, cu orguyo y cu hopi devocion”, e Sacerdote Jose Nava, a expresa.
