The content originally appeared on:
Diario
Isla a haya ‘Baa3 rating’ cu un ‘stable outlook’
Gobierno hopi contento cu e decision positivo pa Aruba
ORANJESTAD (AAN): Den fin di siman, Minister di Finansa a worde informa cu Aruba ta haya un ‘investment rating’ cerca compania di rating Moody’s. Esaki ta un hopi bon noticia pa nos Pais, ya cu awo Aruba ta conta cu dos compania di rating cu ta mira Aruba como Pais na unda cu nan inversion ta sigura.
Mester menciona cu pa mas di dos decada Gobierno di Aruba a traha cu e dos companianan di rating, Fitch y Standard and Poor’s, y recientemente a busca e compania di rating Moody’s como e di tres compania di rating pa evalua e credibilidad financiero di Aruba atrabes di un evaluacion economico y financiero.
Na februari Moody’s a bishita Aruba y a reuni cu varios instancia y persona pa asina por a haci nan evaluacion economico y financiero di nos Pais.
Na april, durante e IMF Spring Meetings na Washington DC, Minister Maduro a bolbe reuni cu Moody’s pa asina por a duna mas detaye cu ta relevante pa e analista y tambe e comite di Moody’s por tene na bista ora di finalisa nan opinion riba Aruba.
Dia 24 di mei tabata asina leu cu Moody’s a sali publica cu nan ta duna Aruba un ‘Baa3 rating’ cu un ‘stable outlook.’
Di e manera aki Aruba ta conta awo cu dos ‘investment rating,’ cerca Standard and Poor’s cu e ‘rating BBB positive’ y cerca Moody’s cu e ‘rating Baa3 stable.’ Tur dos cualificacion ta worde considera ‘investment ratings.’ Cerca Fitch, Aruba tin e ‘rating BB+ positive’ cu ta worde considera ‘non-investment/speculative.’ Sinembargo den nan evaluacion reciente na maart, Fitch a indica cu nan ta positivo pa dentro di poco subi e rating di Aruba na e nivel di inversion manera cu e tabata prome cu pandemia.
Minister Maduro ta gradici tur persona y instancia na Aruba y tambe e team di Moody’s pa e resultado positivo aki pa Aruba, cu ta yuda hisa e credibilidad financiero di nos Pais. Danki pa kere den Aruba!
