The content originally appeared on:
Diario
ORANJESTAD (AAN): Un brote di griep aviar lo por bay pusha y hisa prijs di cierto producto atrobe den siman-
y lunanan venidero, principalmente productonan di webo cu ta wordo produci na Merca.
Ainda publico por corda e prijsnan halto pa webo na comienso di 2023, cu a redobla compara cu e aña anterior. Aña pasa loke a hisa prijs tabata un brote di e virus di ‘Bird Flu’ aki cu a afecta varios lugar cu ta cria galiña na Merca.
Awor pa colmo recien a haya sa cu un otro brote di Bird Flu a wordo registra den e partinan unda tin criaderonan grandi di galiña na Merca, y esaki lo por pusha y hisa prijsnan di webo un biaha mas.
Recientemente e compania Cal-Maine, cu ta e productor di mas grandi, y alavez e distribuidor di webo mas grandi na Merca, a emiti un boletin pa bisa cu un di nan planta na Texas a produci resultado positivo pa e virus. Esey a pone cu nan a haya nan obliga di destrui 1.6 miyon galiña cu ta pone webo. Esaki ta como 3.6% di tur e galiñanan cu e compania aki tin.
E compania temporalmente a stop produccion na e planta aki na Texas, pa asina cumpli cu protocolnan estableci pa agencia USDA di Gobierno Mericano, y ta trahando pa purba minimaliza interupcion di producto na consumidornan, segun e compania a laga sa.
Cal-Maine tin control di como 20% di e mercado di webo na Merca.
Consumidornan no mester preocupa cu nan por haya Bird Flu door di come webo. E virus no por wordo transmiti di bo a trata y cushina webo corectamene, segun USDA a indica. Pesey mes ningun recall a wordo emiti pa cahanan di webo.
Griep aviar ta wordo ocasiona door di contagio cu virus aviar Influenza Tipo-A, cu den naturalesa ta plama entre parhanan silvestre aquatico y nan por contagia parhanan domestico den criaderonan, y otro especie di parha y animal.
Desde Januari 2022, e virus a wordo detecta cerca parhanan silvestre aquatico, galiñanan den criaderonan comercial, y otro parha, cu 1.116 brote raporta di griep aviar na Merca, segun CDC a indica cu cifranan.
Pues si den simannan venidero bo nota aumento di prijs di webo importa aki na Aruba, ya bo sa caba e motibo pa esaki.
