The content originally appeared on:
Diario
Parlamentario Marco Berlis (MEP):
ORANJESTAD (AAN): Diahuebs 30 di Mei 2024 tabata tin e reunion publico cu lo a trata e ley di traspaso di RWZI, e sistema di riool y e incinerator di Aruba pa e entidad nobo AWSS. Mirando e condicion di e sistema di riool y e RWZI na Bubali Plas sigur mester bisa cu un solucion sigur mester a tuma lugar como 15 aña pasa caba. Sinembargo, mester bisa cu no tabata tin e boluntad politico pa inverti ni mantene e planta debidamente pa hopi aña. Tur esaki a cambia ora Gabinete Wever Croes-I-II a goberna y a trece cambio concreto den e maneho desastroso di Mike Eman pa loke ta e tema di RWZI.
Gabinete Wever Croes-I & II: Un cambio gigante den maneho y vision pa RWZI
Na 2018 expertonan a recomenda pa cumpra ekipo y parts y na 2019 a recomenda pa haci un mantenimiento critico di ful e planta. Na 2020 a inverti 3.6 miyon pa algun parts esencial pa e planta. Adicionalmente, entre 2021-2022 a haci inversion di 3.6 miyon y 830K florin den e planta di Bubali.
E decision historico ta cay: Gabinete Wever-Croes II lo bin cu un RWZI nobo!
Despues di decadanan di negligencia y falta di mantencion di RWZI, cual awe ta causando problemanan tur rond di nos isla y nos lama, gobierno di Aruba a dicidi pa bin cu un solucion cu lo bay mitiga e problemanan di RWZI, sistema di riool y e incinerator. Un planta nobo lo bay wordo construi y financia y lo por spera cu e planta lo keda completa den 2-3 aña.
Un planta grandi, moderno y cu un capacidad enorme pa procesa awa sushi.
E planta na Bubali lo conta cu e ultimo tecnologia y lo ta procesa un capacidad mucho mas grandi cu esun actual cu ta data di 1972. E planta actual por procesa 4500m3, pero e planta nobo lo por procesa entre 16.000 m3 pa 20.000 m3 di awa sushi pa dia. E vision di gobierno ta pa pensa riba e futuro y si lo mester procesa mas awa sushi, e planta nobo lo por acapara esaki facilmente.
Oposicion atrobe contra RWZI y tru solucion pa nos pais.
No ta nada straño cu oposicion un biaha mas ta inventa storia di conspiracion y ta trata na kita e logro historico di Gabiente Wever-Croes door di sembra duda riba e ley. Ta bon pa pueblo sa cu AVP, MAS y Gerlien Croes a vota contra un RWZI nobo! Loke ta remarkabel ta cu net politiconan manera Marisol Tromp cu tin 27 aña den politica nunca a haci nada pa RWZI mientras na varios ocasion el a fungi como minister di infrastructura y RWZI tabata bao di su encargo.
Otro politiconan di AVP manera Mike Eman y de Meza di “Old Boys Network”, ex-minister PM y ex-minister di finanzas, cu a manca Aruba cu deficitnan historico bao su maneho y cu nunca a wak e necesidad di bin cu un solucion pa RWZI tras 8 aña di gobernacion. Pueblo ta cansa di wak e politica barata aki, un politica destructivo cu hamas lo reconoce solucion y logronan di un gobierno serio. Sinembargo, pueblo por wak cu solucionnan concreto ta wordo logra pa e retonan di nos pais. Pabien Aruba cu e RWZI nobo!
