Fundacion Corporacion Con Animo na Colombia a cuminsa caso sumario contra Aruba

Gobierno a ordena pa tur pashent bolbe Aruba e siman aki

ORANJESTAD (AAN): Te reina un preocupacion entre famianan di e pashentnan Arubiano interna na Fundacion Corporacion Con Animo na Colombia. Esaki pasobra Gobierno a manda un Decreto Ministerial pa tur e pashentnan na e centro cu Gobierno a stop relacion cu Corporacion Con Animo (CCA) y cu pa e siman aki tur mester bolbe Aruba.

   Ta asina cu CCA tin un finca como 30 minuut leu di Bogota, na un finca grandi na departamento di Cundinamarca, y aki ta tratando pashentnan cu ta exigi un cuido compleho psychiatrico cu no por haya tratamento den Respaldo. Por a compronde cu tin mas cu 10 pashent interna na Colombia cu a base voluntario a bay tuma tratamento y Gobierno ta paga pa esaki.

   Caso pa pone medida di orden: Ta asina cu abogado mr. Canwood cu ta representa CCA a cuminsa un caso pa Hues pone medida di orden contra Gobierno pa para e Decreto Ministerial.

   Tratamento di e caso a tuma lugar Diamars, caminda mr. Canwood a pidi Hues pa pone un medida di orden mientras cu CCA ta cuminsa un caso sumario contra Gobierno.

   Hues a rechaza e peticion pa medida di orden.

   Caso sumario: Den entrevista cu mr. Canwood, el a duna di conoce cu a haci peticion caba pa e caso sumario pero ainda no tin un fecha stipula. E abogado a splica cu aparentemente Gobierno a haya informacion cu tin pashentnan ta worde mal atendi na e centro.

   Esey ta e motibo cu Gobierno kier para e relacion cu tin cu CCA. CCA no ta di acuerdo cu e decision di Gobierno pasobra CCA ta haya cu e pashentnan ta haya e atencion debido.

   Pashentnan no kier bin back: Por a compronde cu hopi famia na Aruba ta preocupa cu e decision di Gobierno pasobra nan ta haya cu no tin un centro cu realmente lo por duna e tratamento cu CCA ta dunando.

   Gobierno a laga sa cu lo parti e pashentnan na diferente instancia na Aruba y eventual na Curacao tambe.

   Ta asina cu Gobierno a stipula cu pa Diabierna awor 6 September 2024, e pashentnan mester ta back na Aruba. Por a compronde cu tin pashentnan cu ta nenga di bin back.

   Por a compronde cu e pashentnan tin e derecho di apela contra e Decreto Ministerial. Esey lo bira un caso LAR. Tempo lo bay mustra si esey lo tuma. Tambe ta pendiente di e caso sumario.